Ауыл партиясы Алматы қаласы филиалы партия жобаларының бірі – «Ауыл нақыштары» фотоконкурсын насихаттауға арналған арнайы іс-шара өткізді, – деп хабарлайды aqshamnews.kz тілшісі.
Шараның негізгі мақсаты – ұлттық құндылықтарды, ауыл өмірінің шынайы болмысын, салт-дәстүр мен еңбек адамдарының бейнесін фотоөнер арқылы кеңінен таныту және шығармашыл азаматтарды қолдау.
Іс-шара барысында филиал өкілдері фотоконкурстың ережелері мен талаптарын таныстырып, байқаудың маңыздылығына тоқталды. Қатысушыларға конкурсқа қатысу тәртібі, жұмыстарды қабылдау мерзімі және бағалау критерийлері туралы жан-жақты ақпарат берілді.
«Ауыл нақыштары» фотоконкурсына кәсіби фотографтармен қатар, әуесқой суретшілер де қатыса алады. Ұйымдастырушылардың айтуынша, байқау – ауыл өмірінің көркем келбетін, табиғат сұлулығын, еңбек адамдарының күнделікті тіршілігін және ұлттық болмысты айшықтайтын бірегей алаң болмақ.
Шара аясында фотографтармен пікір алмасу ұйымдастырылып, қатысушылар өз ұсыныстары мен ойларын ортаға салды. Сонымен қатар, конкурс жеңімпаздарын марапаттау және үздік жұмыстарды көпшілік назарына ұсыну жоспарланып отырғаны айтылды.
Алматы қаласы филиалы барлық шығармашыл азаматтарды «Ауыл нақыштары» фотоконкурсына белсенді қатысуға шақырады. Бұл жоба – ауылдың тыныс-тіршілігін, ұлттық мәдениетті және рухани құндылықтарды дәріптеуге бағытталған маңызды бастама.