Қуат Хамитов актер Еркебұлан Тоқтарға кәсіби бокс ережесімен жекпе-жек өткізуді ұсынды, - деп хабарлайды Aqshamnews.kz.
Белгілі MMA файтері Қуат Хамитов әлеуметтік желіде актер Еркебұлан Тоқтарға кәсіби бокстан жекпе-жек өткізуді ресми түрде ұсынды. 37 жастағы спортшы мұндай кездесу Қазақстан боксы үшін жылдың ең шулы оқиғасына айналуы мүмкін екенін айтады.
Хамитовтың сөзінше, бұл бастаманы өзі көтерген, ал Тоқтар ұсыныстан бейхабар болған.
"Қазақстандағы промоутерлер ұйымдастыратын турнирлердің деңгейі көңіл көншітпейді. Шынайы шоу мен масштаб жоқ. Барлығы жасанды, бәрі өтірік секілді… Ал нағыз қызық кездесу – менің және Еркебұлан Тоқтардың арасындағы айқас болмақ! Мұндай жекпе-жек еліміздегі ең үлкен оқиғаға айналары сөзсіз", – деді Қуат Хамитов.
Тоқтардың жауабы ұзақ күттірмеді
Актер Еркебұлан Тоқтар Хамитовтың ұсынысына видео арқылы жауап беріп, жекпе-жекке келісетінін, тіпті ықтимал күн ретінде өз туған күні 29 желтоқсанды атады.
"Мен бала кезде сенің фанатың болдым. Енді сен маған шақыру жолдап отырсың. Жекпе-жек болады. Иә, дауы да үлкен болады. Бірақ құлау да үлкен болады", - деді актер.
Еркебұлан Тоқтар поп-MMA арқылы танылып, кейін кәсіби деңгейде өнер көрсете бастаған. Topology дерегі бойынша оның рекорды — 11–3. Ал Хамитовтың тәжірибесі әлдеқайда мол — 27–8–2, сонымен қатар ол бокс рингінде де жеңіске жеткен.
Хамитов: «Тоқтардың боксы кейбір MMA спортшыларынан мықты»
Қуат бұл жекпе-жекті өзінің кәсіби MMA мансабына кедергі болмайтынын айтты. 23 қазанда ол Absolute Championship Akhmat (ACA) ұйымындағы дебютінде жеңіске жеткен.
"АСА-да өнер көрсетуді жалғастырамын. Келесі жылы қайта оралғым келеді. Қазір формамды жоғалтпау үшін бокс немесе көрсетілімдік жекпе-жектерде өнер көрсете беремін", — деді спортшы.
Жекпе-жектің нақты өтетін уақыты әзірге белгісіз. Ұйымдастырушылар тарапынан да ресми мәлімет жарияланған жоқ.