Франция астанасы Парижде өткен джиу-джитсудан халықаралық Grand Prix турнирінде атыраулық спортшы Әйгерім Төреғожина алтын медаль жеңіп алды. Бұл туралы Aqshamnews.kz сайты хабарлайды.
Әлемнің 30 елінен жиналған үздік спортшылар арасында Әйгерім файтинг санатында үш қарсыласын айқын басымдықпен жеңіп, жеңіс тұғырынан көрінді. Оның құрметіне Қазақстан әнұраны шырқалып, көк ту желбіреді.
Әйгерім – бірнеше дүркін Қазақстан чемпионы, Азия чемпионаттарының жеңімпазы және әлем біріншілігінің күміс жүлдегері. Қазір ол Атыраудағы М.Сүлейменов атындағы спорт кешенінде жаттығады. Жаттықтырушысы Айбар Есенғалиевтің айтуынша, енді спортшы Иорданияда өтетін Азия чемпионатына дайындалып жатыр.