Британия империясы орденінің кавалері, әлемге әйгілі биші әрі хореограф Акрам Хан Абай атындағы Қазақ ұлттық опера және балет театрының балет труппасына бірнеше күн бойы шеберлік сабақтарын өткізді, деп хабарлайды aqshamnews.kz
18 жасында өзінің қойылымдарымен би әлеміне жаңа серпін берген шебер, қара шаңырақ әртістерінің сезім тілі – би тілін тереңдетуге ықпал етті.
Абай атындағы театрдың балет труппасы үшін Акрам Ханның заманауи хореография стилімен, сезімдер мен эмоцияларды би арқылы жеткізу әдістерімен танысу маңызды болды. Екі аптаға созылған шеберлік сабақтар табысты өтті. Британдық хореограф Абай театры әртістерінің биге деген көзқарасын, педагогтарының ашықтығын ерекше атап өтті.
– Маған балет труппасының педагогтары өте ұнады. Олар мені жылы қарсы алып, тәнім арқылы сұрақ қоюға мүмкіндік берді. Менің мақсатым басқа елге келіп, өз ережемді енгізу емес, сол елдің бишілері арқылы өзімді тану. Классикалық балет әртісі болса да, оның денесі мен қимылы ұлттық мәдениеттің ерекшеліктерін көрсететін тірі қазына іспетті. Сондықтан маған олардың биге деген көзқарасы ұнады. Мен үшін ең маңыздысы – балет труппасының биіндегі рухты сезіну, – дейді қоюшы, биші әрі хореограф Акрам Хан.
Акрам Хан әлемді көп аралап, жұмыс істеген әртістердің арасынан өз компаниясына шақыратын таланттарды іріктейді. Ол Абай атындағы опера және балет театрының кейбір балет әртістерін де жоғары бағалағанын жасырмады. Хореограф Қазақстанға алғаш рет келгенін және алдағы жоспарлары уақыт өте анықталатынын айтты.
Түп тамыры мұсылманнан шыққан әйгілі биші үшін Қазақстанның қасиетті жері – Түркістанға, Қожа Ахмет Яссауи кесенесіне бару маңызды болды. Осы орайда Абай театрының басшылығы оған арнайы сапар ұйымдастырды.
– Мен мұсылман отбасында дүниеге келгендіктен, Қазақстанмен ерекше байланыс сезінемін. Анам рухани тұрғыда терең адам еді, сол байлықты мен Қазақстаннан – мәдениетке деген рухани көзқарастан таптым. Бидегі руханиятты сөзбен жеткізу мүмкін емес, ол – би емес. Би – қозғалыс қана, бірақ сол қозғалысқа дейінгі сәт, сол үзіліс – сенің айтар сөзің, тілің. Әлемде тілдің көп түрі бар, ал бидің тілдері одан да мол. Мен үшін ең қызықтысы – дене тілінің өзі емес, сол тілдің арасындағы үзіліс, қозғалыстар арасындағы тыныштық. Сол кезде сен өзіңнің қалай қимылдағаныңды сезінесің – рухани құндылық дегеніміз сол, – дейді Акрам Хан.
Әлемде танымал және жоғары сұранысқа ие, барлық өнер ордасымен жұмыс істей бермейтін креативті хореографтың «Арыстандар ұйықтап жатқанда» («Until the Lions»), «Kaash», «iTMOi», «DESH», «Тіке жол» («Vertical Road»), «Білім» («Gnosis») және «Нөл белгісі» («Zero Degrees») сияқты қойылымдары бар. Ол Англияның Ұлттық балетімен, Қытайдың Ұлттық балетімен, атақты балерина Сильви Гиллеммен және Джульет Бинош, Кайли Миноуг секілді әлемдік жұлдыздармен жұмыс істеген. Акрам Ханның қоржынында Лоуренс Оливье сыйлығы, ISPA, Фред және Адель Астер сияқты көптеген марапаттар бар.