Алматы қаласының ҚАЖ департаментіне қарасты №11 мекемеде Конституция күніне арналған «Ата заңым аялайды елімді» атты мәдени іс-шара өтті.
Іс-шараны балалар колониясының өкілдері Жамбыл атындағы қалалық жасөспірімдер кітапханасының қызметкерлері Санжар Сейсенбаев және Айда Нұрхановамен бірлесіп өткізді.
— Мақсат - бас бостандығынан айырылған жазалы жасөспірімдерге еліміздің Ата заңы жөнінде мол мағлұмат беру, оларға заң алдындағы жауапкершілікті сезінуіне көмектесу, сондай-ақ, ештеңе де кеш емес, әлі де түзелуге мүмкіндік барын, ол үшін қоғам да қолдау көрсетуге қашанда әзір екенін, дегенмен адам алдымен өзі жақсылыққа ұмтылуы қажеттігін ұғындыру, - дейді мекеменің жасақ бастығы, әділет аға лейтенанты Дамир Еркешов.
Санжар Сейсенбаев Конституцияның тарихынан бастап, бүгінгі бет-бейнесі туралы тағлымды баяндама жасады. Ал жазалы жасөпірімдер Ата заң құрметіне өлең шумақтарын арнады.
Айда Нұрханова елдер мен жер-су туралы қызықты мәліметтерден құралған викториналық сұрақтар қойып, жастардың білімін ашатын қызықты ойын өткізді.
Мерекенің соңы Жамбыл атындағы қалалық жасөспірімдер кітапханасының қызметкерлері дайындаған «Ата заңым аялайды елімді!» атты жаңа кітап көрмесін тамашалаумен аяқталды.
