Асуан Сиябеков Қазақстандағы жылу электр стансаларының (ЖЭС) қоршаған ортаға тигізетін теріс әсері туралы айтып, олардың жұмыс барысында орасан көлемде қалдық шығаратынын мәлімдеді. Оның айтуынша, әрбір жылу электр стансасынан жылына шамамен 200-300 мың тонна қалдық бөлінеді, бұл экологиялық ахуалды күрт нашарлатады.
– Жылу электр стансалары тек ауаға шығатын зиянды заттармен ғана шектелмейді, олар қоршаған ортаға ауыр металдар, күкірт диоксиді, азот оксиді және күл сияқты қалдықтарды да таратады. Бұл қалдықтар экожүйеге, адам денсаулығына кері әсерін тигізіп, түрлі аурулардың пайда болуына себеп болады, – деп атап өтті Сиябеков.
Ол ЖЭС-тің көмірді пайдалану нәтижесінде туындайтын көмірқышқыл газының үлкен көлемі климаттың өзгеруіне де әсер ететінін айтты. Парниктік газдардың артуы жаһандық жылынуға ықпал етеді, ал бұл өз кезегінде әлем бойынша климаттық апаттарға әкеліп соғуы мүмкін.
– ЖЭС-тің 200-300 мың тонна қалдығы – бұл біздің экологияға ауыр салмақ түсіретін өте үлкен көрсеткіш. Әсіресе, бұл қалдықтар жергілікті экожүйеге және халықтың денсаулығына кері әсер етуде. Мұндай жағдайда бізге балама, экологиялық таза энергия көздерін іздестіру қажет. Осы тұрғыдан алғанда, атом электр стансалары ең тиімді шешімдердің бірі, – деді Асуан Сиябеков.
Оның айтуынша, АЭС-тің экологиялық әсері ЖЭС-пен салыстырғанда әлдеқайда төмен. АЭС қалдықтары қайта өңделуге немесе қауіпсіз сақтау үшін арнайы орындарда сақталуға жарамды. Ал ЖЭС қалдықтары табиғатқа ұзақ уақыт бойы зиян келтіріп, қоршаған ортаға елеулі әсерін тигізеді.
– АЭС жылына бар болғаны 80 кг радиоактивті қалдық шығарады, оны қауіпсіз сақтау мен қайта өңдеу мүмкіндігі бар. Бұл ЖЭС-тің 200-300 мың тонна қалдығымен салыстырғанда өте аз. Сондықтан, АЭС экологиялық таза әрі ұзақ мерзімді тұрақтылыққа бағытталған шешім, – деп қорытындылады Асуан Сиябеков.