Астанадағы көтерме және бөлшек сауда базарында өрт шығып, оқиға орнына өрт сөндірушілер жетті, деп хабарлайды Aqshamnews.kz тілшісі Төтенше жағдайлар министрлігіне сілтеме жасап.
Ведомствоның мәліметінше, өрт Сарыарқа ауданында, Ы. Дүкенұлы көшесінде орналасқан базарда болған. Нақтырақ айтқанда, ангар типіндегі бір қабатты ғимараттағы екі бутиктен өрт шыққан.
«Оқиға орнында жедел штаб құрылды. Өрт сөндіру оқпандары енгізіліп, үздіксіз су беру қамтамасыз етілді», – делінген хабарламада.
Министрлік өкілдері өрт сөндіру жұмыстарын күрделендірген бірнеше себепті атап өтті: өрт сөндірушілер келген кезде жалынның қарқынды таралуы, ғимарат құрылымының ерекшелігі, жоғары өрт жүктемесі және қатты түтіндеу жағдайы. Құтқарушылар ғимаратты толық тексеріп шықты, өрт шыққан сәтте ішінде адамдар болмаған.
«Өрт сөндірушілер жалынның таралу қаупін жойып, ашық жануды тоқтатты. Қазіргі уақытта толық сөндіру жұмыстары аяқталды», – деп хабарлады ТЖМ.
Ресми мәлімет бойынша, өрт 08:47-де толық сөндірілді.
Абырой болғанда, зардап шеккендер жоқ.
Өрттің шығу себебі анықталып жатыр.