Бүгін еліміздің шығыс және батыс өңірлерінде жас шекарашы сарбаздар салтанатты түрде ант қабылдап, Отанына адал қызмет етуге серт берді. Осы маңызды сәттің куәсі болу үшін алыстан келген ата-әже, әке-шеше, туған-туыстары мен достарының жүздерінен қуаныш көрініп тұрды.
Осындай салтанаттың бірі ҰҚК Шекара қызметінің Алматы облысы бойынша департаментіне қарасты Қарасай ауданы шекара басқармасының Ақжардағы техникалық және кәсіби даярлық бөлімінде өтті. Жас жауынгер сынын сәтті еңсерген 500-ден астам сарбазды департамент бастығы полковник Ә. Каюпов, «Генералдар кеңесі» республикалық қоғамдық бірлестігінің төрағасы, отставкадағы генерал-лейтенант Б. Сәрсеков, Қазақстан Республикасы Мас-Рестлинг (таяқ тарту) федерациясының вице-президенті Т. Қаналиев және запастағы полковник Д. Мамырханов бастаған шекарашы ардагерлер құттықтады.
ҰҚК Шекара қызметінің әлеуметтік желідегі ресми парақшасы арқылы ел жұртшылығы тікелей эфирден тамашалаған рәсімде ата-аналардың қуанышты жүздерін көруге болады. Олардың бірі, 75 жастағы Б. Дүйсеғалиева тұңғыш немересінің қуанышына ортақтасу үшін Батыс Қазақстаннан арнайы келіпті. Ант қабылдауға кіріскен немересіне мейіріммен қарап тұрған тағы бір әжейді көріп, осынау әсерлі сәтті суретке түсіріп алуға тырыстық.
«Генералдар кеңесі» республикалық қоғамдық бірлестігін басқаратын Бексұлтан Сәрсекұлы салтанатты шараның маңызына тоқтала отырып:
— Бүгінгі күн ерекше! Жас сарбаздар Тәуелсіз елдің шекарасын қорғауға серт беруде. Ата-бабамыздан аманат болып қалған ұлан-ғайыр жерімізді көздің қарашығындай қорғаңдар. Халқымыздың сенімін ақтаңдар, — деп, ағалық тілек білдірді.
Айта кету керек, «Срочник 2.0» бағдарламасы аясында «Күз-2023» шақырылымының екі сарбазы – қатардағы жауынгерлер А. Артықжанов пен Е. Тілеубекке департамент бастығы полковник Әлібек Каюпов арнайы сертификаттар табыстады. Бұл сертификаттар оларға өздері таңдаған жоғары оқу орындарында білім алуға мүмкіндік береді. Сондай-ақ, шара кезінде жақында өткен «Таяқ тарту» сайысының жеңімпазы атанған бірнеше сарбазды Қазақстан Республикасы Мас-Рестлинг федерациясының вице-президенті Т. Қаналиев мақтау қағазы және медальдармен марапаттады.
Шара шекара басқармасының арнайы мақсаттағы ұтқыр топтың жауынгерлік қимылдарына арналған көріністерімен жалғасты. Шекара қызметінің Қызметтік кинология басқармасы иттерінің шеберлігін көрсетіп, көрермендерді тәнті етті.
Ант қабылдау рәсімінен кейін сарбаздар ата-аналары мен туған-туыстарымен қуанышпен қауышып, болашақ ел қорғандары өздерінің мақтаныш сезімдерін жасыра алмады.