Қазақстандық танымал кәсіпкер Арсен Томский Олимпиада чемпионы Михаил Шайдоровтың әкесі Станислав Александровичке Audi Q8 көлігін сыйлады. Бұл туралы ол Instagram парақшасында жазды, – деп хабарлайды aqshamnews.kz тілшісі.
Томский спортшының жеңісін ерекше атап өтіп, бұл жетістікке қазақстандықтардың бәрі қуанып, мақтанатынын жеткізді. Оның айтуынша, көлікті сыйлау – чемпионның отбасына, әсіресе ұлының спорттағы жолының басында тұрған әкесіне деген құрмет пен алғыстың белгісі.
Кәсіпкер Станислав Александровичті Олимпиадалық табыстың тарихындағы маңызды тұлғалардың бірі деп атап өтті. Ол Михаилдың алғашқы бапкері болғанын және бір кезде баласының арманы үшін өз көлігін сатып жібергенін еске салды. Томскийдің сөзінше, бүгін сол арман “алтынға” айналды, ал жаңа көлік – осы ортақ қуаныштың, елдің ризашылығының символы.
Айта кетейік, Томский сыйлаған көліктің бағасы нарықта шамамен 60 миллион теңгеден басталады.