Жобаның нәтижесі мен оның қала тұрғындары үшін маңызы туралы Алматы қаласы Қоғамдық кеңесінің мүшесі Нұрғали Сахов баяндады, – деп хабарлайды aqshamnews.kz тілшісі.
Алматы қаласының Өңірлік коммуникациялар қызметі алаңында тұрғындарға тегін құқықтық көмек көрсетуге бағытталған «Заң мен әділдік - елдің іргетасы» жобасының алғашқы кезеңінің қорытындысы шығарылды.
Оның айтуынша, жоба жүзеге асырылған уақыт ішінде 400-ден астам адам құқықтық қолдау мен кеңес алған. Өтініштердің басым бөлігі тұрғын үй-коммуналдық шаруашылығы, көпқабатты үйлерді басқару, ПИК пен МИБ жұмысы және коммуналдық қызметтер мәселелеріне қатысты болған. Мұндай сұрақтар барлық өтініштердің шамамен төрттен бір бөлігін немесе 25 пайызын құраған.
Тағы 14 пайызы жылжымайтын мүлік пен мүліктік қатынастарға қатысты болса, 12 пайыздан астамы отбасылық құқық мәселелерін қамтыған. Шамамен 11 пайызы қарыз өндіру, келтірілген залалды өтеу және шарттық дауларға байланысты болды. Ал 7 пайызға жуығы құжаттарды рәсімдеу мен тіркеу мәселелерін қозғаған. Қалған өтініштер әлеуметтік қолдау, білім беру, жер және еңбек даулары, атқарушылық іс жүргізу, кәсіпкерлік және несие міндеттемелеріне қатысты болды.
«Бұл көрсеткіштер Қоғамдық кеңес үшін маңызды. Өйткені әрбір өтініш қала тұрғындарының күнделікті кездесетін мәселелерін көрсетеді. Жоба арқылы біз халықты толғандыратын өзекті проблемаларды анықтап, оларды шешу бойынша мемлекеттік органдар мен қалалық қызметтерге нақты ұсыныстар бере аламыз», - деді Нұрғали Сахов.
Оның айтуынша, жоба бірден екі маңызды міндетті атқарады: азаматтарға құқықтық көмек көрсетеді және қоғамдық мониторингтің тиімді құралы қызметін атқарады. Өтініштерді талдау жүйелі мәселелерді анықтауға және шешім қабылдау кезінде халықтың нақты қажеттіліктерін ескеруге мүмкіндік береді.
Жоба аясында тұрғындардың құқықтық көмекке қол жеткізуіне ерекше көңіл бөлінеді. Осы мақсатта Алматының әртүрлі аудандарында ай сайын кемінде сегіз қабылдау ұйымдастырылады. Онда тұрғындар заңгерлерден тегін кеңес алып, өздерін толғандырған құқықтық мәселелер бойынша қажетті ақпарат пен түсініктеме ала алады.
Қабылдаулардың өтетін орны мен уақыты туралы мәліметтер жоба парақшаларында тұрақты түрде жарияланып отырады.
Сонымен қатар, азаматтар үшін жедел желі мен чат-бот жұмыс істейді. Олар арқылы бастапқы құқықтық кеңес алып, жақын арадағы іс-шаралар туралы ақпарат пен қажетті анықтамалық мәліметтерді алуға болады.
Нұрғали Сахов жобаның маңызды ерекшеліктерінің бірі оның алдын алу бағыты екенін атап өтті. Өтініштердің басым бөлігі тұрғын үй, отбасылық қатынастар, коммуналдық қызметтер, әлеуметтік кепілдіктер мен мүліктік құқықтар сияқты күнделікті өмірдегі мәселелерге қатысты. Уақытылы берілген кеңес азаматтарға заңнаманы жақсырақ түсінуге, өз құқықтарын қорғауға және күрделі жанжалдардың алдын алуға көмектеседі.
Кездесуге қатысушылар «Заң мен әділдік - елдің іргетасы» жобасының Алматы тұрғындары арасында жоғары сұранысқа ие екенін атап өтті. Алынған нәтижелер мемлекет пен қоғам арасындағы өзара іс-қимыл тетіктерін одан әрі жетілдіруге және халыққа құқықтық көмектің қолжетімділігін арттыруға пайдаланылмақ.
Кездесу соңында Нұрғали Сахов жобаға атсалысқан заңгерлерге, адвокаттарға, еріктілерге және серіктестерге алғысын білдіріп, бастаманың одан әрі дамуы азаматтардың құқықтарын қорғауды күшейтіп, қоғамдағы құқықтық мәдениетті нығайта түсетініне сенім білдірді.