Шеруді барыс Әділет бастады, – деп хабарлайды aqshamnews.kz тілшісі.
Алматының көгілдір аспаны, «Сайлау» атты авторлық әннің ырғағы, желбіреген Қазақстан тулары және ондаған пазл элементінен құралған «Құрылтай» сөзі — дәл осындай ерекше көрініс қаладағы басты Арбатта Қазақстан Республикасы Құрылтайы депутаттарының алдағы сайлауына арналған жастар акциясында орын алды.
Іс-шараны Алматының жарқын символдарының бірі — барыс Әділет ашты. Ол жастар шеруін бастап, шараға көтеріңкі көңіл-күй сыйлады. Одан кейін акция қатысушылары «Сайлау» («Выборы») авторлық әнінің тұсаукесерін ұсынып, хореографиялық флешмоб орындады. Музыка, би және заманауи шығармашылық шешімдер біртұтас әсерлі қойылымға ұласты.
Көрермендердің ерекше назарын пазл элементтерімен дайындалған қойылым аударды. Қатысушылар қолдарындағы жеке бөліктерді біртіндеп біріктіріп, «Құрылтай» деген ортақ сөзді құрастырды. Бұл қоғамның бірлігін және ел болашағына ортақ жауапкершілікті білдіретін символдық көрініс болды. Осы сәтте камера таза көгілдір аспанға көтеріліп, ашықтық, үміт және жасампаздық идеясын айқын бейнелейтін әсерлі визуалды көрініс қалыптастырды. Кейін флешмобқа қатысушылар авторлық әннің серпінді әуеніне заманауи би ұсынды.
Акцияның шарықтау шегі жастардың қолдарына Қазақстан Республикасының Мемлекеттік туын ұстап өнер көрсетуімен аяқталды. Қатысушылар шағын нұсқадағы мемлекеттік тулармен би билеп, кейін алаңға үлкен тулар мен «Құрылтай» жазуы бар баннер шығарылды. Бұл сәт шығармашылық қойылымның эмоциялық қорытындысына айналып, бірлік, отансүйгіштік және азаматтық белсенділік идеяларын айқын көрсетті.
Іс-шараның басты ерекшелігі — алдағы электоралдық науқанға арнайы жастар белсенділері дайындаған «Сайлау» авторлық әні болды. Ұйымдастырушылар шығармашылық, музыка және заманауи форматтар арқылы қала тұрғындарына сайлауға қатысудың маңызын және әр азаматтың ел болашағына деген жеке жауапкершілігін жеткізуді мақсат етті.
Акция барысында Алматы тұрғындары мен қонақтары өтіп жатқан шараны қызығушылықпен тамашалап, жарқын сәттерді ұялы телефондарына түсіріп, қатысушыларды қол шапалақпен қолдады. Көрермендердің ерекше ықыласына ие болған кейіпкерлердің бірі — барыс Әділет болды. Ол Арбатқа келген тұрғындармен және қонақтармен суретке түсіп, шараның есте қаларлық бөлігіне айналды.
Ұйымдастырушылардың айтуынша, мұндай креативті бастамалар жастармен азаматтық белсенділік туралы заманауи әрі түсінікті тілде — шығармашылық, музыка және жағымды эмоциялар арқылы сөйлесуге мүмкіндік береді.
Еске сала кетейік, Қазақстан Республикасы Құрылтайы депутаттарының сайлауы 2026 жылғы 23 тамызда өтеді. Акция ұйымдастырушылары елдің болашағы әр азаматтың саналы таңдауынан қалыптасатынына, ал сайлауға қатысу — Қазақстанның одан әрі дамуына өз үлесін қосу мүмкіндігі екеніне сенімді.