Ақтауда таңертең 29А ықшамауданында орналасқан техникалық жөндеу орталығында (ТЖО) ірі өрт шықты. Екі қабатты нысандағы бес гараж боксының екеуін жалын шарпып, бірнеше көлік толық жанып кеткен, деп хабарлайды Aqshamnews.kz тілшісі Lada.kz-ке сілтеме жасап.
Маңғыстау облыстық ТЖД мәліметінше, өрт салдарынан станцияның екі қызметкері зардап шеккен. Екеуі де облыстық ауруханаға ауыр жағдайда жеткізіліп, жансақтау бөліміне жатқызылған. Дәрігерлер олардың жасанды тыныс алу аппаратына қосылғанын хабарлады. Бір зардап шегушіде кең көлемді термиялық күйік, екіншісінде II–III дәрежелі күйік және тыныс жолдарының ингаляциялық зақымдануы анықталған.
Өрт кезінде СТО ішінде тұрған үш көлікке зақым келген: бірінің мотор бөлігі мен салоны жанып, тағы екі көлік толықтай өртенген. Ғимарат сыртында тұрған автокөліктер де зардап шеккені айтылады. Өрт аумағы шамамен 150 шаршы метрді құраған (ғимараттың жалпы аумағы - 600 шаршы метр).
Өрт 09:21-де оқшауланып, 10:43-те толық сөндірілді. Қазір өрттің шығу себебі анықталып жатыр. Өртті сөндіруге төтенше жағдайлар қызметі, полиция және апат медицинасы қызметі жұмылдырылған.