Ақсу қаласында 5 жасар қыз бала ыстық су толған шұңқырға құлап, күйік жарақатымен ауруханаға жеткізілді, деп хабарлайды Aqshamnews.kz.
Куәгерлердің айтуынша, оқыс жағдай балалар ойнап жүрген аула маңында, құбыр жарылу салдарынан пайда болған шұңқырда болған.
Ақсу әкімдігі оқиғаны растады. Қыз бала 6 қыркүйек күні сағат шамамен 17:30-да Әуэзов көшесінде, дүкендердің бірінің жанында апатты жерге түсіп кеткен.
«Бала ыстық су құбыры жарылып, пайда болған шұңқырға құлаған. Дене мен аяқтарының I–III дәрежелі күйігі бар. Павлодар облыстық балалар ауруханасына жеткізілді. Жалпы күйік аумағы – 17 пайыз», – деп мәлімдеді әкімдіктегілер.
Қазір бүлдіршіннің жағдайы орташа ауыр деп бағалануда. Ол травматология бөлімінде ем қабылдап жатыр.
Қаланың коммуналдық қызметтері оқиғаға қатысты әзірге түсініктеме берген жоқ.