«Аlmaty aqshamy» газетінің оқырмандары тағы да зор қуанышқа кенелді. Сүйікті басылымдарына жазылып, түбіртегін редакцияға жолдаған оқырмандар арасында ұтыс ойыны ұйымдастырылып, жеңімпаздар белгілі болды.
Оқырмандар қатарында «Білгенім бір тоғыз, білмегенім тоқсан тоғыз» деп, басылымның әрбір санын қызыға парақтап, 35 жыл бірге келе жатқан оқырмандар да болды. Дегенмен, патша көңіл оқырманның басты мақсаты – ұтысқа қатысып, ұту емес, сүйікті басылыммен бірге болу.
Бүгінде газетіміздің тұрақты оқырманына айналған Сейітқали Мырзабеков Алматыға басқа өңірден қоныс аударған көрінеді.
– Алматыда тұратын әрбір тұрғын қаламыздың басты басылымына жазылуы тиіс. Осы қалаға көшіп келген күннен бастап, «Ақшамға» жазылған едім. Газет біздің отбасының бір мүшесіне айналып кеткелі қашан. Балаларыма да оқып беремін. Тарихи материалдарды қиып алып, сақтап қоямын, – дейді тұрақты оқырман.
Бұл күні ұтыс ойынына қатысып, бағалы сыйлыққа қол жеткізген оқырмандардың көңіл-күйлері тіпті көтеріңкі болды.
Тұрақты оқырманымыз Сейітқали Мырзабеков «Almaty aqshamy» газетінің жеңімпазы атанып, қысқа толқынды «MAQNA M 20 В7001- W» пешін, Еркін Түсіпханов «Frizzman FF-38» шәйнек-термосын, Ләйля Игілікова «Sobranie MJ-2819» блендерін ұтып алды.