Мәжіліс депутаты Ринат Зайыт бас прокурор Берік Асыловқа депутаттық сауал жолдап, олигархиялық топтардан қайтарылып жатқан активтердің халыққа пайдасы мен олардың болашақтағы тағдырына қатысты ашық ақпарат талап етті, - деп хабарлайды Аqshamnews.kz тілшісі.
Депутат Ринат Рифхатұлы Зайыт Мемлекет басшысы Қасым-Жомарт Тоқаев жариялаған "Әділетті Қазақстан" тұжырымдамасынан кейін әділеттілік ұғымы қоғамда кең қолданысқа енгенімен, оның толық жүзеге асуы үшін әлі де батыл қадамдар қажет екенін атап өтті. Оның айтуынша, Қаржы министрлігінің жанындағы Активтерді қайтару комитеті соңғы уақытта ықпалды тұлғалардың күмәнді байлығына қатысты тергеуді күшейтіп, нақты нәтижелерге қол жеткізе бастаған.
Мәселен, жуырда Болат Назарбаевтың ұлы Нұрбол Назарбаев сот шешімімен 57 млрд теңге көлеміндегі активінен айырылып, мемлекетке қайтарылды. Сонымен қатар оған 925 млн теңге айыппұл және 230,4 млн теңге айыпақы салынған. Депутат бұл үдерісті оң бағалай отырып, қоғамда әсіресе "Алтын орда" базары мен Алматы қаласы мен облысындағы заңсыз жер телімдері жайлы сұрақтар көп екенін айтты.
"Бұл нысандардың тәркіленген активтердің қатарында бар-жоғы белгісіз. Сот процестері жабық өткендіктен, халық олардың тағдыры жайында нақты ақпарат ала алмай отыр", – деді ол.
Зайыттың айтуынша, қайтарылған активтердің қаншалықты халық игілігіне жаратыны, жұмыс орындарының сақталуы сияқты мәселелер түсініксіз күйде қалып отыр.
Сондықтан депутат бас прокурорға мынадай ұсыныстарын жеткізді:
- Нұрбол Назарбаевтың барлық активтеріне толық түгендеу жүргізіп, заңсыздарын мемлекет меншігіне қайтару;
- Заңсыз активтердің қайтарылғаннан кейінгі пайдаланылуы туралы толық ақпаратты ашық жариялау;
- "Алтын орда" базары мен Алматы қаласы және облысындағы заңсыз жер телімдеріне қатысты тергеуді бастау.
"Әділетті Қазақстан" қағидатын жүзеге асыру үшін бұл мәселелер қоғамға ашық әрі айқын түсіндіріліп, халыққа нақты пайдасын тигізуі тиіс", – деп түйіндеді депутат Ринат Зайыт.