Жаңа Конституцияны қабылдау жөніндегі алдағы референдум қарсаңында қоғам өкілдері қазақстандықтарды белсенділік танытып, дауыс беруге шақырды. Олардың пікірінше, референдум елдің дамуы мен мемлекеттік құрылымның жаңарған үлгісін қалыптастырудың маңызды кезеңі болмақ.
Алматыдағы «Қазақстандық орыс мәдени орталығы» қоғамдық бірлестігінің бөлімше төрағасы, Алматы қаласы Қазақстан халқы Ассамблеясының Ақсақалдар кеңесінің мүшесі Всеволод Лукашевтің айтуынша, осындайда әр азамат мемлекеттің болашағына жауапты болуы керек, – деп хабарлайды aqshamnews.kz тілшісі.
Оның сөзінше, жаңа Конституция – әділетті әрі заманға сай Қазақстан құруға деген ұмтылыстың символы. Бұл ретте қоғам мүддесі ескеріліп, бірлік пен тұрақтылық қағидаттары нығая түседі. Сондықтан әр адам дауыс беріп, референдумға бір кісідей қатысуы керек деген пікір айтты.
Қоғам қайраткері қазақстандықтарды шет қалмай, референдумға қатысуға шақырып, белсенді азаматтық ұстаным демократиялық үдерістер мен қоғамдағы сенімді нығайтудың маңызды шарты екенін айтты.