Өңірлік коммуникациялар қызметінде өткен баспасөз конференциясында Наурызбай ауданының әкімі Назира Тоғызбаева жол инфрақұрылымы қалай дамып жатқанын баяндады. Ауданда жаңа жол салу, көшелерді жөндеу мен магистральдарды ұзарту жұмысын қатар қолға алған, – деп хабарлайды aqshamnews.kz тілшісі.
«Наурызбай ауданы жол салу мен жөндеу жұмысы жалғастырып жатыр. Биыл Жол инфрақұрылымын дамыту басқармасы Ақжар шағынауданында жаңа сал салады. Биылғы қазанға дейін 30 шақырымнан астам жолға асфальт төсейді. Сонымен қатар, көше-жол желісін жөндеу мен абаттандыру жобалары қатар іске асып жатыр», — дейді аудан әкімі Назира Тоғызбаева.
Орташа жөндеу аясында жалпы ұзындығы 12,4 шақырым болатын 12 көшені жаңартпақ. Қосымша ұзындығы 23,5 шақырым болатын тағы 33 көшені жөндеуге өтініш берілген. Жұмыс байқау рәсімі аяқталған соң басталмақ.
Сонымен қатар, жалпы ауданы 45 мың шаршы метр жол жөнделіп жатыр, 800-ге жуық люк түзетіліп, ауыстырылады, арық науасы ішінара жаңартылады.
«Біз жаңа жолдар салудан бастап, ағымдағы жөндеу мен инфрақұрылымды жаңғыртуға дейін бірнеше бағыт бойынша қатар жұмыс істеп жатырмыз. Люктер мен арық жүйесінің жағдайына ерекше көңіл бөлінеді, себебі бұл тұрғындардың қауіпсіздігі мен жайлылығына тікелей әсер етеді. Барлық жұмыс кезең-кезеңімен және басым учаскелерді ескере отырып жүргізіледі. Бұл мүмкіндігінше көп көшені қамтуға мүмкіндік береді», — дейді спикер.
Сондай-ақ, жалпы ұзындығы 3,2 шақырым болатын 12 көшеде техникалық тротуарлар салу жоспарланған. Қазіргі таңда Әшімов көшесінде ұзындығы 530 метр тротуар салынып, 150 қалқымалы люк орнату көзделген.
Абай даңғылы, Төле би мен Жұбанов көшесін ұзартып жатыр. Абай даңғылы бойынша жоспарланған 5,3 шақырымның 4,7 шақырымы салынды, қалған бөлігі бір нысанды бұзғаннан кейін аяқталады. Төле би көшесінің 2,3 шақырымдық учаскесінде 1,2 шақырымға асфальт төселді, 104 жер телімінің 98-і сатып алынды, жұмысты балдағы желтоқсанда аяқтайды.
«Магистральды көшелерді дамыту — ауданның негізгі басым бағытының бірі. Абай даңғылы, Төле би мен Жұбанов көшесін ұзарту көлік қатынасын айтарлықтай жақсартып, қолданыстағы жолдарға түсетін жүктемені азайтады. Жұмыс жер телімін сатып алу қажеттілігіне байланысты қиындады, алайда бұл үдеріс тоқтамайды. Барлық жоба аяқталған соң, аудан тұрғындары оның жемісін көреді», — дейді Назира Тоғызбаева.
Жұбанов көшесінде қазіргі таңда 365 жер телімінің 175-і сатып алынған. Құрылысты аяқтау 2027 жылға жоспарланған.