2019 жылдан бері жүзеге асып келе жатқан "Almaty Business – 2025" бағдарламасы бойынша Алматының кәсіпкерлері жалпы сомасы 52,7 млрд теңге жеңілдетілген қаржы алды. Бұл қаржы 774 бизнес-жобаны қолдап, 6 мыңнан астам жұмыс орнын ашуға мүмкіндік берген. "Almaty Finance" ЖШС және "Almaty" МҚҰ оны жылдық 2% және 6% мөлшерлемемен берді. Өңірлік коммуникациялар қызметінің баспасөз мәслихатында "Almaty Finance" ЖШС басқарма төрағасы Берік Құсайынов осылай деп хабарлады.
Бағдарлама шағын және орта бизнесті дамытып, қаржыландыруды қолайлы етуді көздейді. Осы бағдарламамен кәсіпкерлер 7 жылға дейінгі мерзімге жеңілдетілген несие ала алады. 2% мөлшерлеме әлеуметтік жағынан осал топтарға, 6% мөлшерлеме қалған барлық ШОБ нысандарына арналған.
"Almaty Finance" беретін ең жоғарғы несие – 500 млн теңге, "Almaty" МҚҰ арқылы – 78,64 млн теңгеге дейін алуға болады. Ол ақша жабдық сатып алуға, шикізат пен айналым қаражатын толықтыруға, сондай-ақ, бизнестегі басқа да мақсатқа жұмсалады.
Бағдарламада өндірістік, инновациялық, экспортқа бағытталған жобаларға, креативті индустрия мен шағын өнеркәсіптік парктердегі бастамаларға көп көңіл бөлген. Бағдарламаны іске асыру кезеңінде осындай 18 парк салынды.
Берік Құсайынов "Almaty Business – 2025" бағдарламасы денсаулық сақтау, білім беру, туризм, спорт, қызмет көрсету саласы мен әлеуметтік кәсіпкерлік бағытындағы бизнесті де қолдайтынын атап өтті. 2025 жылдың 9 айында 70 жоба қаржыландырылып, 9,8 млрд теңге бөлініп, 793 жұмыс орны ашылған.
52,7 млрд теңгенің ішіндегі 25,6 млрд теңге бюджеттен бөлініп, олар қайтарымды-револьверлік механизм арқылы тиімді пайдаланылды. Ең көп жоба Бостандық ауданында (152), Алатау ауданында (149), Алмалы ауданында (97) және Медеу ауданында (93) іске асты.
Жеңілдетілген қаржыландыру алғандардың бірі – көпір құрылымдарын дайындаумен айналысатын "АЗМК Group" компаниялар тобы. Алғашқы 250 млн теңге траншы жаңа жабдық сатып алуға жұмсалды. Қазіргі кезде 230 млн теңге көлеміндегі екінші транш игеріліп жатыр.
"Almaty Business" бағдарламасына алғысымыз шексіз. Біз осы бағдарлама арқылы 6 пайыздық несие алып, еншілес кәсіпорнымыз – "Темір ЖБ" ЖШС үшін лазерлік жабдық, станоктар мен автоматты дәнекерлеу кешендерін сатып алдық. Барлық жабдық орнатылып, жұмыс істеп тұр. Соның арқасында зауыттың өнімділігі үш есе артып, қызметкерлер саны 25%-ға көбейді. Алматының әкімдігі мен осындай бағдарламаларға зор алғыс білдіреміз. Олар қаланың өнеркәсібін дамытуға, зауыттар мен басқа да кәсіпорындардың өнім сапасын арттыруға көмектеседі", – дейді "АЗМК Group" компаниялар тобының инновациялар жөніндегі директоры Ерік Жексебаев.
Бағдарлама Алматы қаласының экономикасының тұрақты дамуына үлес қосып, кәсіпкерлерге жаңа мүмкіндіктерге жол ашып беріп отыр.
