Өнімдерді 300-ден астам ауыл шаруашылығы тауар өндірушілері ұсынады
Алматыда қолжетімді бағада жаңа әрі балғын өнімдер алуға болатын тағы бір орын ашылады, деп хабарлайды aqshamnews.kz.
Жетісу ауданында «демалыс күнгі жәрмеңке» жұмысын бастайтынын «Алматы» әлеуметтік-кәсіпкерлік корпорациясы хабарлады.
Жәрмеңкенің мақсаты – жергілікті шаруаларға өз өнімдерін өткізуге мүмкіндік жасау, ал тұрғындарға әлеуметтік маңызы бар азық-түлікті қолжетімді бағамен ұсыну.
Алдағы демалыс күндері Құлагер ықшамауданындағы «Гүлдер» саябағының алдында 15 сауда жасайтын шатырлар қойылады. Мұнда жылқы, сиыр, қой және құс еті, сүт өнімдері, жұмыртқа, көкөніс пен жеміс-жидек, сондай-ақ жаңа піскен нан-тоқаш өнімдері сатылады. Сауда алаңы демалыс күндері сағат 09:00-ден 18:00-ге дейін жұмыс істейді.
Қазір демалыс күнгі жәрмеңкелер Алматының бірнеше ауданында тұрақты түрде өтеді:
- Алмалы ауданы – Масанчи көшесі (Әйтеке би – Гоголь көшелерінің арасы);
- Әуезов ауданы – Өтеген батыр көшесі (Абай даңғылынан төмен);
- Бостандық ауданы – Қазақфильм ықшамауданы (әл-Фараби даңғылынан жоғары);
- Медеу ауданы – Меңдіқұлов бульвары – Бектұров көшесі.
Апта сайын жәрмеңкелерге 45 мыңнан астам қала тұрғыны келеді. Өнімдерді Алматы мен Алматы облысының 300-ден астам ауыл шаруашылығы тауар өндірушілері ұсынады. Сауда сөрелерінде 1000-нан астам тауар түрі бар: ет, жұмыртқа, көкөніс, жеміс-жидек, сүт өнімдері, шұжық, бал және тағы басқасы.
Бағаны тұрақтандыру шаралары аясында әлеуметтік маңызы бар азық-түліктер нарықтағыдан 15–20 пайыз төмен бағамен сатылады.