Кездесуге Жетісу ауданының әкімі Ләззат Жылқыбаева, мемлекеттік органдардың өкілдері, қала әкімдігі басқармаларының мамандары, аудан кәсіпкерлері және табиғатты қорғау полициясының қызметкерлері қатысты, - деп хабарлайды aqshamnews.kz.
Жиында атмосфералық ауаны қорғауға қатысты жаңа экологиялық талаптарды іс жүзінде түсіндіру және оларды кезең-кезеңімен енгізу тетіктеріне ерекше назар аударылды. Кәсіпкерлер толғандырған сұрақтарын қойып, ықтимал тәуекелдерді талқылады.
Алматы қаласы Экология және қоршаған орта басқармасының басшысы Серік Әділбаев кездесудің тек түсіндіру сипатында өткенін атап өтті.
«Біздің міндетіміз – жаңа экологиялық талаптардың мәнін жеткізу, олардың не үшін енгізіліп жатқанын түсіндіру және бизнеске тәуекелсіз мен айыппұлсыз жұмыс істеу жолдарын көрсету. Бұл қысым көрсету емес, шығарындылар саласында кезең-кезеңімен тәртіп орнату мәселесі», – деді ол.
Еске салсақ, Қазақстан Республикасының Экологиялық кодексінің 206-бабын іске асыру аясында Алматы қаласының әкімдігі атмосфералық ауаны қорғау қағидаларын әзірлеген болатын. Аталған құжат 2025 жылы 30 желтоқсанда қала мәслихатында бекітілді.
Құжат төрт негізгі бағытты қамтиды: автокөліктерді пайдалану тәртібін реттеу, III санаттағы нысандарға қойылатын экологиялық талаптар, шығарындылар деңгейі төмен аймақты ұйымдастыру, сондай-ақ қолайсыз метеорологиялық жағдайда мониторинг жүргізу, цифрландыру және жедел әрекет ету шаралары.
Жетісу ауданында жүргізілген мониторинг нәтижесінде 213 қоғамдық тамақтану орны, коммерциялық монша мен техникалық қызмет көрсету бекеттері, сондай-ақ 76 өнеркәсіптік кәсіпорын жұмыс істейтіні анықталды. Оның ішінде 51 нысан III санатқа жатады және жиынтығында атмосфералық ауаға елеулі жүктеме түсіреді.
«Осы жылдан бастап экологиялық талаптардың сақталуына тұрақты мониторинг жүргізу көзделген. Қазірдің өзінде пайдаланылып жатқан отын мен жабдықты бағалап, экологиялық тұрғыдан тиімді шешімдерге көшуді жоспарлау маңызды. Біз бизнестің жауапты әрі саналы ұстанымына сенім артамыз», – деп сөзін түйіндеді Серік Әділбаев.