ӨКҚ баспасөз-конференциясы барысында Алматы қаласы әкімінің орынбасары Әлішер Әбдіқадыров мегаполисте жасыл желектерді отырғызу және абаттандыру жұмыстары жалғасып жатқанын айтты.
Мәселен, 2023 жылы мегаполистің жасыл желектерінің ауданы адам басына 12 шаршы метрге дейін ұлғайтылды, деп хабарлайды Almaty-akshamy.kz.
Қаланы көгалдандыру үшін осы жылдың басынан бастап 180 мың ағаш және 60 мың бұта отырғызылды. Санитарлық мақсатта 13,1 мың ағаш кесіліп, 2,3 млн. ағаш өңделді. Авто суарумен қамту 4,4 есеге артып, 587 гектарға жетті.
Баспасөз-конференциясы барысында айтылғандай, жасыл желектерді күтіп-ұстау және қорғау жөніндегі жаңа ережелерге сәйкес, 2023 жылдан бастап суару жүйесі жүргізілгеннен кейін 2-2,5 м кем болмайтын көшет отырғызуды көздейтін жаңа тәсіл қолданылды.
«Жаңа ережелер бойынша жасыл желектерді био өңдеу енгізілді және санитарлық және қалыптап өңдеуге бірыңғай талаптар әзірленді», - деп атап өтті Ә. Әбдіқадыров.
Сонымен қатар, саябақтар мен парк аумақтары жаңартылуда. Осылайша, абаттандыру аясында алты саябақты (Оқушылар сарайы, ҚБТУ, Байсейітова көшесі, Әуежай даңқы, Желтоқсан саябағы, Көкмайса шағын ауданындағы саябақ) қайта жаңарту аяқталды. Жыл басынан бері саябақ аумақтарының ауданы 712-ден 977 гектарға дейін кеңейтілді.
Алматыда барлығы 153 саябақ пен сквер, 355 жаяу жүргіншідер және жасыл аймақ, 23 бульвар және 11 жағалау бар.