2023 жылы шаһар экономикасы 4,4%-ке өседі.
Осы жылдың 11 айында Алматыға 1,2 трлн теңгеден астам инвестиция тартылған. Бұл туралы Алматы әкімі Ерболат Досаев Қазақстан Президенті Қасым-Жомар Тоқаевтың қатысыуымен өткен Үкімет отырысында айтты, деп хабарайды Аlmaty-akshamy.kz.
«Алматы тұрғындарының өмір сүру сапасын одан әрі жақсарту және әлеуметтік, инженерлік, көлік инфрақұрылымына қатысты жүйелі мәселелерді шешу үшін осы жылдың қыркүйек айында «Алматы қаласын 2025 жылға дейін дамыту бағдарламасы және 2030 жылға дейінгі орта мерзімді перспективалар» бекітілді. Сіздің белсенді қолдау көрсетуіңіздің және қала әкімдігі қабылдаған шаралардың арқасында биылғы жылдың 11 айында қысқа мерзімді экономикалық индикатор 6,2%-ке дейін жеделдеп, өңірлер арасында алдыңғы позицияны қамтамасыз етті.Өңдеу өнеркәсібі өсу драйверіне айналып, өсу қарқыны бойынша елде 1-ші орынға шықты (+14,8%)», - деді Ерболат Досаев өз сөзінде.
Оның айтуынша, жеке инвестициялардың 16%-ке өсуімен инвестициялық белсенділіктің жоғары деңгейі қамтамасыз етілді. Осы жылдың 11 айында барлығы 1,2 трлн. теңгеден астам инвестиция (1248 млрд.) тартылды.
«Биылғы жылдың басынан бастап белсенді жұмыс істейтін шағын және орта бизнес субъектілерінің саны 38,5%-ке (285,6 мыңға дейін) өсті. Шағын және орта бизнестің 2,1 мың жобасына (94 млрд. теңге) қолдау көрсетудің арқасында 55,7 мың жұмыс орны құрылды, оның 70%-і тұрақты жұмыс орындары. Бұл жұмыссыздық деңгейін 5,0%-ке дейін төмендетуге мүмкіндік берді.Біздің болжамымыз бойынша жоғарыда аталған шаралар Алматы экономикасының 2022 жылы 5,0%-ке дейін өсуін қамтамасыз етеді», - деді қала әкімі.
2023 жылы әкімдіктің негізгі міндеті Алматы қаласының даму бағдарламасына сәйкес экономиканың тұрақты нағаюын қамтамасыз ету болмақ.
«Бұл ретте, жоғары технологиялық және «таза» өндірістерді, туризмді, IT-секторды және креативті индустрияларды дамытуға баса назар аударылатын болады. Қала экономикасын одан әрі әртараптандыру үшін Сіз Алматы индустриялық аймағының аумағын 189 гектарға кеңейту мәселесін қолдадыңыз. 7 шағын өнеркәсіп паркін іске қосу, креативті индустриялардың венчурлық қорын құру, 40 млрд. теңге сомасына басым бағыттардағы 2,6 мыңға жуық жобаны қаржыландыру жоспарланған. Жалпы, 1,5 трлн. теңге инвестиция тартылады. Осының арқасында 2023 жылы Алматы қаласының экономикасы 4,4%-ке өседі», - деді Ерболат Досаев.