Алматы қаласы Бостандық ауданының әкімі Азамат Қалдыбеков бұқаралық ақпарат құралдары мен қалалық медиа қауымдастық өкілдерімен нетворкинг және Q&A форматында кездесу өткізді, – деп хабарлайды aqshamnews.kz тілшісі.
Еркін атмосферада көрініс тапқан ашық диалог барысында мегаполистегі ең ірі аудандардың бірі – Бостандық ауданын дамытудың негізгі бағыттары, басым міндеттер және қоғамдық кеңістіктерді одан әрі абаттандыру жоспары талқыланды.
Азамат Қалдыбеков аулалар, саябақтар, гүлзарлар мен қоғамдық кеңістіктерді абаттандыру, тұрғын үй қорын жаңғырту, жаяу жүргіншілер инфрақұрылымын дамыту, көгалдандыру және тұрғындар үшін жайлы қалалық орта қалыптастыруға бағытталған тың жобалар туралы баяндады.
Сонымен қатар, халықтың өмір сүру сапасын арттыру, заманауи қалалық инфрақұрылымды дамыту, қауіпсіз әрі қолайлы қоғамдық кеңістіктерді құруға бағытталған жобаларды іске асыру мәселелеріне, оның ішінде «Халық қатысатын бюджет» бағдарламасы аясында жүзеге асырылып жатқан бастамаларға ерекше назар аударылды.
Ашық әрі сындарлы жағдайда өткен кездесу барысында медиа өкілдері өздерін қызықтырған, толғандырған сұрақтарын қойып, пікір алмасып, аудан әкімдігі жұмысының өзекті бағыттары бойынша жан-жақты жауаптар алды.
"Біз алдағы уақытта да ашықтық қағидаттарын ұстана отырып, ауданның орнықты дамуына бағытталған жобалардың іске асырылуы мен қабылданып жатқан шешімдер туралы тұрғындар мен бұқаралық ақпарат құралдарын тұрақты түрде хабардар етіп отыратын боламыз", – деді Бостандық ауданының әкімі Азамат Қалдыбеков.
Нұржамал ӘЛІШ