Алматы әкімі Дархан Сатыбалды жұмыс сапары барысында қала тұрғындары мен қонақтарына арналған жаңа қоғамдық кеңістіктің абаттандырылу жұмыстарын көріп қайтты.
Жаңа саябақ Жароков пен Си Синхай көшелерінің қиылысында, «Оңтүстік» саябағының солтүстігінде орналасқан. Жалпы аумағы 4,1 гектар.
Қазіргі таңда аумақта жаяу жүргіншілерге арналған жолдар төселіп, балаларға ойнауға ыңғайлы алаңқайлар орнатылып, жарықтандыру жүйесі мен шағын сәулеттік элементтер қойылып жатыр. Көгалдандыруға ерекше көңіл бөлініп, 120-дан астам ірі ағаш, атап айтқанда жөке, талшын және қарағай отырғызу көзделген. Жаңа саябақ алматылықтардың тынығып, серуендейтін заманауи әрі жайлы мекеніне айналмақ.
Мердігер ұйымдардың өкілдеріне қарата сөйлеген қала әкімі атқарылатын істің мерзімі мен сапасын бұлжытпай орындаудың маңыздылығын атап өтті:
«Мердігерлерге нақты тапсырма берілді, құрылыс белгіленген уақытта әрі тиісті деңгейде аяқталуға тиіс. Қала тұрғындарына сапалы жұмыс керек, біз мерзімнің созылып кетуіне немесе атүсті жасауға жол бермейміз. Егер тәртіп бұзушылықтар анықталса, қатаң шаралар қолданамыз», — деді Дархан Сатыбалды.
Ол жобаны жауапсыз орындаған жағдайда орындаушылардың жеке жауапкершілігі бар екенін де еске салды. Қала басшысының тапсырмасы бойынша құрылыс жұмыстарын үш ай ішінде толық аяқтау жоспарланып отыр.