Алматының Алмалы ауданы инженерлік желіні жаңғырта бастады, – деп хабарлайды aqshamnews.kz тілшісі.
Өңірлік коммуникациялар қызметінде аудан әкімі Арман Шәмшин аудандағы инженерлік инфрақұрылымды жаңғырту жоспары туралы баяндады.
Оның айтуынша, ауданда аулаларды абаттандырумен қатар, көзге көріне бермейтін, бірақ өмір сапасына тікелей әсер ететін тозған инженерлік желілерді жаңартуды көздейтін үлкен жұмыс та қолға алыныпты.
Қазір коммуникациялардың тозу деңгейі жоғары болып отыр: жылу желілері 62,1%-ға, сумен жабдықтау желілері 72,5%-ға, су бұру жүйелері 79,2%-ға, электрмен жабдықтау желілері 81%-ға тозған.
Ең аз тозғаны - газ желісі екен. Олар 10,7% тозыпты.
2026 жылы барлық бағыт бойынша кешенді жұмыстар жоспарланған. Атап айтқанда, «Алматы жылу жүйесі» ЖШС 19 мекенжай бойынша 8,8 шақырым жылу желісін жаңғыртуды қолға алмақ. Сумен жабдықтау мен су бұру саласында «Алматы Су» МКК бес жерде 2,4 шақырым болатын желіні жаңарту жобасын жүзеге асырады, оның ішінде 1,4 шақырым сумен жабдықтау мен 1 шақырым су бұру желісі де бар.
Электрмен жабдықтау саласында да көп жұмыс істеледі: «АлатауЖарықКомпаниясы» АҚ 22 учаскеде 93,3 шақырым болатын электр желісін қайта жаңғыртуды жоспарлап қойды. Сонымен қатар газ инфрақұрылымы да біге жаңарады. «QazaqGaz Аймақ» АҚ тоғыз мекенжайдағы 17,1 шақырым желіні жаңартқалы отыр.
Арман Шәмшин атап өткендей, бұл жобаларды іске асыру инженерлік желілердің тозу деңгейін едәуір төмендетіп, ауданның инфрақұрылымының сенімділігін арттыруға мүмкіндік береді.