Наурыз мерекесі қарсаңында Алматыда алғаш рет бірден үш мұз айдынында ұлттық киіммен сырғанау іс-шарасы ұйымдастырылды, – деп хабарлайды aqshamnews.kz тілшісі.
18 наурыз күні сағат 16:00-ден бастап Алматы Арена, Халық Арена мен Олимпик кешендері барлық ниет білдірушілерге есігін айқара ашты. Бірінші болып сырғанағысы келіп, айдынға алып ұшқан мектеп оқушылары болды.
Қала әкімдігінің бастамасымен бұл іс-шарада студенттерден бастап балалы отбасылар мен үлкен кісілерге дейіін тегін сырғанап, қаншама адам бас қосты.
Әсіресе көз тартар камзол, әсем сәукеле мен зерлі шапандар іс-шараның ажарын ашып, айдынды тіпті әсем етіп жіберді.
Мұз айдындары қазір дәстүр мен осы заманғы қала өмірі үйлесім тапқан ерекше кеңістікке айналды осылайша.
Қонақтар қуана суретке түсіп, алған әсерін айтып, мұздың бетіне шығып, мәдени мұраны осылай да насихаттауға болатынын көңілге түйіп қайтты.
Бұл кеш спорттық демалыс қана емес, ұрпақ сабақтастығы мен ұлттық құндылыққа деген құрметтің жарқын үлгісіне айналды.
Алматы дәстүрді танытуда ештеңе кедергі бола алмайтынын тағы дәлелдеп отыр.