Алматыдағы №138 КММ «№5 мектеп-гимназиясында» орналасқан сайлау учаскесінде таңғы уақыт әуезді ән мен күмбірлеген күйге бөленді, деп хабарлайды aqshamnews.kz тілшісі.
Сағат 07:00-де қатысушылар мен ұйымдастырушылар әуен ырғағымен жаттығу жасап, бой сергітті. Дауыс беруге келген тұрғындар да бұл бастамаға қосылып, сергек қимылдап, күнді тың серпінмен бастады.
Жұртшылық еліміздің болашағына қатысты маңызды науқаннан шет қалмай, өз таңдауын жасауға келді. Бұл олардың азаматтық белсенділігін де аңғартты.
Бүгін елімізде Құрылтай депутаттарын сайлау өтіп жатыр. Құрылтай – елдің қоғамдық-саяси өміріне қатысты маңызды мәселелер талқыланатын өкілді алаң. Сайлау арқылы азаматтар өз таңдауын жасап, елдегі саяси процеске үн қосуға мүмкіндік алады.
Сайлау учаскесі орналасқан мектепте сәндік-қолданбалы өнер жәрмеңкесі де ұйымдастырылды. Көрмеге оқушылар мен педагогтер әзірлеген түрлі бұйымдар қойылды. Ағаш, картон, былғары және киізден жасалған туындылардан ұлттық дәстүр мен қолөнердің айқын үлгісін көруге болады.
Мектептің бейнелеу өнері және еңбек пәндерінің мұғалімі Алла Кобринаның айтуынша, жәрмеңкеге қойылған бұйымдар — оқушылар мен ұстаздардың бірлескен шығармашылық жұмысының нәтижесі. Мұндай іс-шаралар балалардың шығармашылық қабілетін шыңдап, ұлттық қолөнерге қызығушылығын арттырып, еңбекті бағалауға тәрбиелейді.
Жәрмеңкеге келгендер ұсынылған бұйымдарды тамашалап, өздеріне ұнағандарын сатып алды. Шара мектеп оқушылары мен педагогтердің шығармашылық мүмкіндігін танытып, сайлау күнінің мазмұнын аша түсті.