Алматы қаласы өңірлік коммуникациялар қызметінің алаңында ҚР Төтенше жағдайлар министрлігінің Республикалық жедел-құтқару жасағының өкілдері қатысқан брифинг өтті. Құтқарушылар биылғы маусымдағы ең жиі кездесетін оқиғалар, таулы бағыттардағы жұмыс және демалушылардың қауіпсіздігін арттыру шаралары туралы айтты.
ТЖМ РЖҚЖ мәліметінше, жыл басынан бері 478 жедел шығу жүзеге асқан. Оның 167-сі таулы және жетуі қиын аумақтардағы іздестіру-құтқару жұмыстары. Барлығы 156 адам құтқарылған, оның 26-сы – балалар. Одан бөлек 25 адамға, соның ішінде екі балаға алғашқы медициналық көмек көрсетілген. Қазіргі таңда құтқарушылар тауда және су айдындарында төтенше жағдайлардың алдын алу бойынша ауқымды профилактикалық жұмыс жүргізіп жатыр.
ТЖМ РЖҚЖ таулы бөлімшесінің бас құтқарушысы Вадим Пактың айтуынша, тәжірибесі аз туристер дайындықсыз жолға шығу, бағытты туыстарына хабарламау, навигациялық және байланыс құралдарының болмауы сияқты жиі бірқатар қателіктерді жібереді.
"Таудағы жазатайым жағдайлардың негізгі себептері, біріншіден, адамның өз күшін дұрыс бағаламауы және дайындық деңгейіне сай келмейтін бағытты таңдауы. Соның салдарынан турист уақытында орала алмайды немесе бағыттың ерекшеліктерін білмей, апатты жағдайға тап болады. Тағы бір қателік – қажетті жабдықтың болмауы. Тауға шығарда міндетті түрде рюкзак, қосалқы батареясы бар шам, байланысқа шығуға арналған пауэрбанк және жылы киім болуы керек, себебі тауда қазір салқын әрі қараңғы тез түседі", - деді Вадим Пак.
Құтқарушылардың айтуынша, әр турист одан бөлек дәрі қобдишасын, жеткілікті су және азық қорын да алып жүруі тиіс.
Алматы маңындағы тауларда қауіпсіздікті қамтамасыз ету үшін құтқарушылар адамдар көп жүретін бағыттарда кезекшілік атқарып, түсіндіру жұмыстарын және рейдтер өткізеді.
Сүңгуір-құтқару бөлімінің бас құтқарушысы Бейсенғали Дүйсебаевтың айтуынша, су тасқыны, көшкін, ауа температурасының күрт өзгеруі сияқты ауа райы жағдайларына байланысты қауіп-қатерлердің алдын алуға баса назар аударылады.
"Төтенше жағдайлар департаменті тұрғындарға алдын ала арнайы хабарламалар жолдайды. Қауіпті учаскелер анықталған жағдайда қар көшкінінен жасанды қорғау және өзен аңғарларында селден қорғау жұмыстары жүргізіледі. Белгіленген аумақтарда бақылау-өткізу бекеттері қойылып, тәулік бойы мониторинг ұйымдастырылады. Құтқару іс-шараларына волонтерлер де тартылады", - деп атап өтті маман.
Таудағы басқа да қауіптер туралы айта отырып, құтқарушылар жабайы аңдармен кездесу ықтималдығының артып келе жатқанын атап өтті. Аю немесе жабайы мысық секілді жануарлармен тікелей байланыс сирек болса да, соңғы жылдары мұндай жағдайлардың қаупі көбейген.
"Қазір адамдардың жабдықталуы жақсарған: арнайы аяқ киім, рюкзак арқасында олар алысқа, тереңірек тауға бара алады. Сол себепті жабайы жануарлармен кездесу мүмкіндігі де артады. Мұндай жағдайда ең бастысы үрейленбей, сабыр сақтау. Мысалы, аюмен кездестіңіз делік, ондай жағдайда артқа қашуға болмайды, орныңызда тұрып, жайлап кейін шегіну қажет. Жанында қонжығы болған жағдайда аю қауіп сезінеді, екеуінің ортасында қалып қойсаңыз, аю шабуылдауы мүмкін", - деп түсіндірді Вадим Пак.
Құтқарушылар қала тұрғындары мен қонақтарына демалысты қауіпсіз өткізу үшін қарапайым ережелерді есте сақтауға шақырады:
- маршрут пен оралу уақытын жақындарына хабарлау;
- тауға жалғыз немесе қолайсыз ауа-райында шықпау;
- өзімен бірге жылы киім, дәрі қобдишасы мен байланыс құралдарын алу;
- белгіленген соқпақтардан шықпау;
- төтенше жағдай туындағанда 112 нөміріне қоңырау шалу.