Миландық «Интер» командасы Алматылық «Қайратты» өз алаңында 2:1 есебімен жеңді, - деп хабарлайды Aqshamnews.kz.
Кездесу 6 қарашаға қараған түні Италияның Милан қаласындағы әйгілі «Джузеппе Меацца» стадионында өтті. Бұл - ЧЛ-дің жалпы кезеңіндегі төртінші тур ойыны болды.
Ойынның алғашқы минуттарында алаң иелері допқа толық иелік етіп, «Қайраттың» қақпасына бірнеше қауіпті шабуыл жасады. 18-минутта «Интердің» қорғаушысы Ян-Аурель Биссек пен «Қайрат» ойыншысы Офри Арадтың арасындағы эпизодтан кейін төреші VAR жүйесіне жүгінді, бірақ пенальти белгіленген жоқ.
45-минутта миландықтар есеп ашты. Федерико Димарконың пасынан кейін Лаутаро Мартинес қазақстандық клубтың қақпасын дәл көздеп, «Интерге» алғашқы голды сыйлады.
Бірінші тайм 1:0 есебімен аяқталды.
Екінші таймның басында «Қайрат» сапында Еркін Тапалов алаңға шықты. Ал 56-минутта алматылық команда бұрыштамадан кейін нәтижелі соққы жасап, есепті теңестірді. Голдың авторы — қорғаушы Офри Арад.
Алайда 67-минутта «Интер» қайта алға шықты. Себастьяно Эспозитоның пасын пайдаланып, Карлос Аугусто допты қақпаға дөп түсірді — 2:1. Қалған уақытта есеп өзгермеді.
Осылайша, Миланның «Интері» «Қайратты» жеңіп, өз алаңындағы маңызды үш ұпайды еншіледі.
Айта кетейік, бұл матчқа дейін италиялық команда Чемпиондар лигасында бірде-бір гол жібермеген еді. Ал «Қайраттың» бүгінгі голы сол серияны үзді.