Оқушылар қонақтарға арнап мерекелік концерттік бағдарлама дайындады, деп хабарлайды aqshamnews.kz тілшісі.
Алматы қаласы Түрксіб ауданындағы КГУ «№44 мектеп-гимназиясында» «Адал азамат» бағдарламасын жүзеге асыру аясында Қарттар күніне арналған «Қарттарын қадірлеген ел ардақты!» атты салтанатты мерекелік іс-шара өтті.
Мерекелік кездесуге Түрксіб ауданы филиалының Белсенді ұзақ өмір сүру орталығының өкілдері, сондай-ақ мектебіміздің оқушыларының ата-әжелері арнайы шақырылды.
Салтанатты іс-шараны мектеп директоры М.Ж. Хасенова ашып, қонақтарды мерекемен құттықтап, аға буынның отбасы тәрбиесіндегі, ұлттық құндылықтар мен өмірлік тәжірибені ұрпаққа жеткізудегі маңыздылығын атап өтті.
Оқушылар қонақтарға арнап мерекелік концерттік бағдарлама дайындады. Әсем әндер шырқалып, өлеңдер оқылып, би және шығармашылық нөмірлер ұсынылды.
Ал кештің ерекше әрі әсерлі сәті – Белсенді ұзақ өмір сүру орталығының қонақтарының өздері балаларға арнап музыкалық сый дайындауы болды. Олардың өнері оқушыларға көтеріңкі көңіл күй сыйлап, кештің мазмұнын одан әрі жандандыра түсті.
Бүгінгі кездесу үлкендер мен жас ұрпақ арасындағы жылы байланысты нығайтып, өзара құрмет, алғыс пен мейірімділіктің тамаша үлгісіне айналды.