Алматылық Камиля Досмалова пара таэквондодан Азия чемпионы атанды, – деп хабарлайды aqshamnews.kz тілшісі.
Моңғолия астанасы Ұлан-Батыр қаласында пара таэквондодан XI Азия чемпионаты өтіп жатыр. Құрлықтық додаға Азияның 15 елінен 94 спортшы қатысуда. Алматылық спортшы Камиля Досмалова K44 санатында 57 келіге дейінгі салмақ дәрежесінде алтын медаль жеңіп алды. Бұл туралы Алматы қаласының Спорт басқармасының өкілдері хабарлады.
Финалдық кездесуде қазақстандық спортшы Иран өкілі Захра Рахим қарсыласын 2:0 есебімен басым түсті.
Басқарма өкілдерінің мәліметінше, Камиля Досмалова Қазақстандағы пара таэквондо спортындағы үздік спортшылардың бірі. Ол бұған дейін де ел намысын Паралимпиада ойындары мен Азия Пара ойындары сияқты ірі халықаралық жарыстарда қорғаған.
Жеңістің маңызын турнирдің G-2 санатына жататыны арттыра түседі. Азия чемпионатындағы алтын медаль үшін спортшыға әлемдік рейтингке әсер ететін 20 рейтингтік ұпай беріледі. Бұл халықаралық жарыстарға іріктеуде маңызды рөл атқарады.