Алматылық семсерлесушілер София Ақтаева мен Тимофей Семёнов жасөспірімдер арасындағы Әлем кубогында күміс пен қола жүлде алды, - деп хабарлайды Aqshamnews.kz тілшісі.
БАӘ-нің Фуджейра қаласында жасөспірімдердің арасында рапирамен семсерлесуден Әлем кубогы болып өтті. Халықаралық жарыстың қорытындысы бойынша Қазақстан құрамасының спортшылары деңгейі жоғары екенін көрсетіп, жүлделі орынға ие болды.
София Актаева жарыстың барлық кезеңінен сенімді өтіп, финалға дейін жетті. Қорытындысында ол Әлем кубогының күміс жүлдесін жеңіп алды.
Жарыстың соңғы күні жеке кездесуде Тимофей Семёнов жақсы өнер көрсетіп, жасөспірімдер арасындағы Әлем кубогының қола медалін алды.
Қазақстандық спортшылардың осы жолы сәтті өнер көрсеткені олардың халықаралық аренада бәсекеге қабілетті екенін тағы бір мәрте дәлелдеп берді.
Жасөспірімдер арасындағы семсерлесуден Әлем кубогының кезеңі (FIE Junior World Cup) 2026 жылғы 2–4 қаңтар аралығында Фуджейрада (БАӘ) өтіп, жарыста жасөспірімдер мен кадеттер рапирамен сайысқа түскен.