Еліміз бойынша 24 ақпан – 24 наурыз аралығында Дүниежүзілік туберкулезге қарсы күрес күніне осы дерттің алдын алуға арналған айлық өтіп жатыр. Биылғы айлықтың ұраны – «Біз туберкулезді жеңеміз!».
Алматыдағы №24 емхана дәрігерлері Ләззат Берікқызы мен Әлия Тұрсынбекқызы №11 мекемеде жазасын өтеп жатқан жасөспірімдер үшін ақпараттық-түсіндіру жұмысын жүргізді. Мамандар жастарға туберкулезден сақтану жолдарын түсіндірді. Оларға денсаулықтың маңыздылығын айтып берді. Салауатты өмір салтын ұстанып жүруге шақырды.
Айта кетсек, №11 мекемеде Денсаулық сақтау министрлігі бұйрығының барлық нормасы қатаң сақталады. Жасөспірімдер мекемеге түскеннен кейін үш тәулік ішінде флюорографиялық тексеруден өтеді.
Жылына екі мәрте ФГ- тексеру болады. Қазақстан Республикасының Бас мемлекеттік санитарлық дәрігерінің қаулысымен белгіленген санитарлық-дезинфекциялық режимді сақтау жұмыстары жүйелі түрде ұйымдастырылады.