Тілеуғали Сатыбалдиев әлеуметтік желідегі парақшасында әдемі киім үлгілерін көрсетіп, немерелерімен қызықты ролик түсіреді.
Оның бейнежазбалары миллионнан аса адамның көңілінен шыққан. Ақсақалдың өзі TikTok-та танымал боламын, деп ойламаған. Тілеуғали Сатыбалдиевтың алғашқы ролигі бірден көрермендердің көңілін жаулап алады. Ол киімді талғаммен киеді. 83 жасқа келсе де, тың, қимылымен де ерекше, деп хабарлайды Almaty-akshamy.kz 24.kz-ке сілтеме жасап.
Ол жарты жылдан бері әртүрлі бейнежазбалар түсіріп, парақшасына жазылған көрермендерін қуантып жүр. Түсірілім мен монтаж жұмыстарына немерелері көмектеседі екен.
«Екінші немере қызым уақытында көркемдік училищесін бітірген. Мынаны киіңіз, мынаны шешіңіз, бүйтіңіз, сүйтіңіз деп сол мені осы желіге салып жүрген. Алдында "Сізді бір миллион қарапты" деді, одан кейін "2 миллионға жетіпті" деп қуанып жүрген. Таңқалып, одан әрі құмар болып кеттім», - дейді тиктокер Тілеуғали Сатыбалдиев.
Алты ай бұрын Тілеуғали ата өзінің құдай қосқан жарынан айырылып қалады. Көңілі құлазып, мұңаймас үшін, балалары мен немерелері аталарына TikTok желісін үйретіпті. Алматы тұрғыны бала кезінен сәнді киінгенді жақсы көретінін айтады. «Ер адамның үстіндегі киімі таза әрі жарасымды болуы керек», - дейді.
«Мен киімді өзім таңдаймын. Өзіме ұнағанын аламын, кемпірім болған уақытта да көп кеңес берген жоқ маған. "Қой, мен өзім білемін" деймін. Кішкентай бала кезімнен жыртылған киімімді өзім келістіріп тігіп аламын. Сөйтіп өстім ғой», - дейді тиктокер ақсалал Тілеуғали Сатыбалдиев.
Ақсақал: «Мақсатым - танымал болу емес, өмірімді мәнді өткізу», - дейді. Оған қоса немере, шөберелеріне жақсы тәрбие бергісі келетінін айтады.