Алматыда таза да жайлы өмір сүруге қолайлы қала кеңістігін қалыптастыру жұмыстары жүйелі түрде жалғасып келеді. Сол игі бастамалардың бірі атмосфералық ауаны қорғауға арналған жаңа ережелер жобасын әзірлеу, яғни «Атмосфералық ауаны қорғау саласындағы арнайы экологиялық талаптарды енгізу туралы» құжат. Құжат биыл тамыз айында қоғамдық талқылаудан өтті.
Жобаның басты мақсаты – мегаполистегі ауаның ластану деңгейін жүйелі түрде төмендету. «Ренессанс плюс» компаниясының дерегінше, зиянды шығарындылардың шамамен 60 пайызы автокөліктен шығады. Қалған бөлігі жеке тұрғын үйлер өнеркәсіп орындары, монша мен кәуапхана, қоғамдық тамақтану нысаны мен құрылыс алаңдары сынды стационарлық ластану көздерінің қызметімен байланысты.
Бұл ережелер жобасы қаланың болашақ экологиялық саясатының берік іргетасы. Оның негізінде зиянды шығарындыны азайтуға, ауа сапасын жақсартуға бағытталған нақты қадамдар мен тетіктер кезең-кезеңімен жүзеге аспақ. Ұсынылған шаралардың арасында өндіріс ошақтарын жаңғырту, экологиялық таза отын түрлеріне көшу секілді маңызды бағыттар бар.
Ережелер жобасын қабылдау мен жүзеге асыру қаланың экологиялық жағдайын жақсартып, алматылықтардың өмір сүруге барынша қолайлы жағдай туғызуға жол ашады.
Сонымен қатар, қала тұрғындары ауа сапасы ең алдымен көлік саны мен әр азаматтың табиғатқа деген көзқарасына байланысты екенін айтады. «Таза ауа аймағы» жобасы аясында жүргізілген сауалнама барысында кейбір тұрғындар таза ауамен тыныстау үшін тауға шығуға мәжбүр екенін жеткізген. Олардың пікірінше, экологиялық ахуалды жақсарту бірлескен күш-жігердің нәтижесінде ғана жүзеге асатын ортақ іс. Себебі, бұл әлемдік мәселе.