Алматыда қыс мезгілі өз сәнімен келіп, қаланы аппақ қар жапқанда, бәрінен бұрын Алматы зообағының ақ аюы Пурга ерекше шаттанды. Суықты жақсы көретін алып жыртқыш үшін бұл – нағыз мереке, деп хабарлайды Aqshamnews.kz
Таңертең зообақ қызметкерлері Пургамен кездесуге келгенде, оның кәдімгідей көңілді екенін байқады. Аю үлкен ауласын айналып жүгіріп, қарға аунап, табандарымен аппақ ұнтаққа із қалдырды. Қар қабатын иіскеп, тіпті кей жерін тістеп те көрді.
Пурга үшін бұл жай суық ауа райы емес, нағыз ойын алаңы. Ол қарды алдыңғы табандарымен көсітіп, үстіне домалап, өзінің табиғи мекеніне оралғандай күй кешті. Кейде қарды түйіршік етіп жинап, онымен ойнайды.
Ақ аюлардың табиғаттағы тіршілік ету ортасы – Арктика, сондықтан Алматының қарлы күндері Пургаға ерекше қуаныш сыйлайды. Жазғы аптап ыстықта бассейн суында салқындап жүрсе, қыста табиғи суық ауа райының өзі оған керемет жайлылық әкеледі.
Зообақ мамандарының айтуынша, ақ аюлар – нағыз қар мен мұздың жанкүйерлері. Сондықтан Алматыға жауған қар – Пурга үшін ең керемет тосынсый болды.