Жамбыл полицейлері Алматыдан көлік ұрлаған азаматты қолға түсірді.
24 қаңтар Жамбыл облысы патрульдік полиция батальонының қызметкерлері Алматыдан Toyota Camry автокөлігін ұрлап, Шымкент қаласы бағытында келе жатқан күдіктіні ұстау туралы бағдар алды, деп хабарлайды Almaty-akshamy.kz Polisia.kz-ке сілтеме жасап.
ПД патрульдік полиция батальоны взводының қызметкерлері Батыс Еуропа – Батыс Қытай республикалық маңызы бар автожолының 240-шақырымында қызмет өткеру кезінде аталған автокөлікті байқап, оны тоқтату және ұстау үшін шаралар қабылдады.
Тексеру барысында жүргізушінің көлік құралын басқаруға тиісті құжаттары жоқ екендігі және іздеудегi ұрланған автокөлік ретінде тіркелгені анықталды. Аталған көліктің салонында жүргізушіден басқа тағы 2 жолаушы болған. Көлік ұрлағаннан кейін жүргізуші ақша табуға шешім қабылдап, жолда өзіне екі жолаушыны отырғызғаны белгілі болды. Тез арада ұсталған жерге Қордай аудандық полиция бөлімінің жедел-тергеу тобы келді.
Қазіргі уақытта күдікті Алматы қаласы Бостандық ауданының ПБ әріптестеріне одан әрі анықтау мақсатында берiлді.