Алматы қаласының Жамбыл атындағы қалалық жасөспірімдер кітапханасының мамандары «Кітап оқуға құштарлық» атты жоба аясында түзеу мекемесіндегі жастар арасында кітап оқудан жарыс өткізді, – деп хабарлайды aqshamnews.kz тілшісі.
Алматы қаласы Қылмыстық-атқару жүйесі департаментінің №11 мекемесінде кітапхана бар. Істі болып, жазасын өтеп жатқан жасөспірімдер бос уақытында кітап оқиды.
Жуырда Алматы қаласының Жамбыл атындағы қалалық жасөспірімдер кітапханасының мамандары «Кітап оқуға құштарлық» атты жоба аясында түзеу мекемесіндегі жастар арасында кітап оқудан жарыс өткізді. Оған аталмыш кітапханананың белді қызметкері Шарайна Құмарова қазылық етті. Сондай-ақ мекемедегі жалпы білім беретін мектептің тіл маманы Айзада Алиева және САӘПТЖБ бастығы әділет майоры Бағдат Талапбаев болды.
Іс-шараға кітапқұмар 16 жасөспірім қатысты. Олар оқыған кітаптарының мән-мазмұнын, не түсінгенін баяндап берді. Балалар оқыған кітаптардың арасында Абайдың, Дулат Исабековтің, Бердібек Соқпақбаевтың туындылары болды. Жастар сондай-ақ шытырман оқиғаларға толы детектив шығармаларды, орыс классиктерін де сүйіп оқитынын байқатты.
Кітапқа құмар жастарға ешқайсысын бөліп-жармай, бәріне оқуға құштарлығы, жақсылыққа ұмтылысы үшін «Алғыс хат» табысталды.