Алматыда Наурызнама онкүндігі аясында жарқын әрі мазмұнды Ұлттық спорт күні өтті. Тұңғыш Президент саябағында мерекелік жарыс ұйымдастырылып, қала тұрғындары мен қонақтар дәстүрлі ойындар мен сайысқа қатысты, – деп хабарлайды aqshamnews.kz тілшісі.
Биылғы турнирге 1000-нан астам адам қатысты. Ұлттық спорттың бірнеше түрінен жарыс өтті, олардың қатарында асық ату, ләңгі тебу, қошқар көтеру, арқан тарту мен басқа ойындар да бар.
Қатысушылар команда болып және жекелей бақ сынасты.
Бостандық ауданы мәдениет және тілдерді дамыту бөлімінің бас маманы Төрежан Өтегеновтің айтуынша, іс-шараның басты мақсаты — ұлттық дәстүрді сақтау мен насихаттау екен:
«Қазіргі таңда ауданымызда Наурызнама онкүндігіне орай ұлттық спорт түрінен жарыс өтіп жатыр. Жалпы саны 1000-нан астам адам тіркелді оған. Басты мақсатымыз — ұлттық спортты дамыту меннасихаттау, жас ұрпаққа дәстүрлі ойындарды таныстыру».
Іс-шараға Мақан Есболатов атындағы Алматы академиясының курсанттары да белсене қатысты. Дене шынықтыру кафедрасы бастығының орынбасары Бекжан Телтаев мұндай бастаманың жастарды тәрбиелеуге көп пайдасы тиетінін айтады:
«Академиядан 71 курсант қатысып жатыр. Барлығы жарысқа өздері қосылды. Біз курсанттардың арасында ұлттық спорт түрін барынша насихаттауды қолға алдық. Жастар осы заманғы ойынды ғана таңдамай, ұлттық спортпен де айналысуы тиіс».
Әсіресе арқан тарту көрермендерді ерекше елітті. Жеңімпаз атанған — Республикалық спорт колледжінің студенттер командасы.
Команда мүшесі Ұлдана Тілеухан былай дейдіі:
«Бүгінгі жарыс жоғары деңгейде өтіп, бәрі керемет болды. Командамыз бірінші орын алды, ұйымдастырушыларға ерекше алғыс айтамыз. Біз алғаш рет қатыссақ та, жақсы көзге түстік осы жолы. Алдағы уақытта да осындай жарыстарға қатысуға дайынбыз».
Мерекелік іс-шаралар 23 наурызға дейін жалғасады.
Ұйымдастырушылар барша тұрғындар мен қала қонақтарын Наурыз мерекесіне қатысып, ауқымды мәдени шараға атсалысуға шақырады. Қонақтар жарыстан бөлек, ең үлкен сырмақ пен шаңырақтың көрмесі сияқты ерекше этномәдени экспозицияларды да тамашалайды.