Ресейлік өкілдер қаладағы 15 сайлау учаскесін аралағанын айтты, деп хабарлайды aqshamnews.kz тілшісі.
Ресей Федерациясынан келген халықаралық байқаушылар тобының өкілі, Ленинград облысы Сайлау комиссиясының төрағасы Михаил Лебединский Алматыдағы брифингте ТМД миссиясы құрамындағы ресейлік өкілдер қаладағы 15 сайлау учаскесін аралағанын айтты.
Оның айтуынша, сайлау ашық әрі қалыпты жұмыс жағдайында өтіп жатыр. Байқаушы сайлау үдерісі Қазақстан Республикасының заңнамалық талабы мен халықаралық стандартқа сәйкес ұйымдастырылғанын атап өтті.
Сондай-ақ ол уәкілетті органдар тарапынан ұйымдастыру жұмыстарының жоғары деңгейде жүргізілгеніне назар аударды. Ерекше қажеттілігі бар азаматтардың дауыс беруіне де қолайлы жағдай жасалған.
Атап айтқанда, халықаралық байқаушылар медициналық мекемелерде орналасқан сайлау учаскелерін аралады. Солардың бірінде жөндеу жұмыстары жүріп жатқанына қарамастан, сайлау комиссиясы мен байқаушылардың жұмысына, сондай-ақ сайлаушылардың дауыс беруіне қажетті барлық жағдай қамтамасыз етілген.
«Құрылтай сайлауы Қазақстан үшін тарихи кезеңде өтіп жатыр», – деді Михаил Лебединский.