Алматы прокуратурасы екі мектеп оқушысының өзіне қол жұмсау ісі бойынша бес айдан бері жүргізіліп жатқан тергеу барысы туралы пікір білдірді, деп хабарлайды aqshamnews.kz.
Ресми сұрауға жауап ретінде қалалық прокуратура мектеп оқушыларының суицид жасау оқиғасы бойынша қылмыстық іс Қазақстан Республикасы Бас прокуратурасының сотқа дейінгі тергеу қызметі өндірісінде екенін хабарлады.
"Қазіргі уақытта сотқа дейінгі тергеу жалғасып жатыр. Қылмыстық қудалау органы оқиғаның барлық мән-жайын Қазақстан Республикасы Қылмыстық-процестік кодексінің 24-бабының талаптарына сәйкес анықтап жатыр", – деді Алматы прокурорының орынбасары Асхат Шәріпов.
16 қыркүйекте Алматыдағы тұрғын үйдің жанынан екі оқушы қыздың мәйіті табылған еді. Қайғылы оқиға Алмалы ауданында болған.
Алғашқы ақпарат әлеуметтік желілерде тарады, онда қыздардың пәтер терезесінен құлап кеткені туралы болжамдар айтылған. Сондай-ақ, бұл қайғылы оқиғаның "қауіпті" онлайн ойындар мен ерекше әдебиеттермен байланысы болуы мүмкін деген пікірлер пайда болды. Кейін Алматы полициясы мектеп оқушыларының қайтыс болғанын растады. Алмалы ауданының полиция басқармасы қылмыстық іс қозғап, оқиғаның себебі мен мән-жайын анықтай бастады.
Ішкі істер министрінің орынбасары Игорь Лепеха бұл оқиғаның суицид екенін мәлімдеп, "Өзін-өзі өлтіруге дейін жеткізу" бабы бойынша қылмыстық іс қозғалғанын хабарлады.