Алматыдағы ең жас Наурызбай ауданында бірінші жартыжылдықта 100 мың шаршы метр тұрғын үй пайдалануға берілді
2024 жылы Алматыдағы Наурызбай ауданының бюджеті 4 млрд теңгеге өсіп, 18 млрд теңгеге жетті. Биыл маусымда аудан бюджеті тағы 5 млрд теңгеге өсіп, 23 млрд теңге болды. Бұл туралы қала әкімі Ерболат Досаев аудан тұрғындарымен кездесуде мәлімдеді, деп хабарлайды almaty-akshamy.kz
Алматы әкімі биыл құрылғанына 10 жыл болатын дамып келе жатқан аудан тұрғындарының әлеуметтік және инфрақұрылымдық мәселесін шешуге қаржы жұмсалатынын атады. Бірінші жартыжылдықтың қорытындысы ауданның серпінді әлеуметтік-экономикалық дамуын айғақтайды.
Мәселен, жұмыс істеп тұрған бизнес субъектілерінің саны 15%-ға өсіп, 22 396-ға жетті. Бұл өткен жылдың осы кезеңімен салыстырғанда салық түсімін 60%-ға арттырып, 25 млрд теңгеге дейін ұлғайтуға мүмкіндік берді. 1800 жаңа тұрақты жұмыс орны құрылды.
Сондай-ақ, осы жылдың 6 айында Наурызбай ауданында 100 мың шаршы метрден астам тұрғын үй пайдалануға берілді, бұл 2023 жылдың осы кезеңімен салыстырғанда 23%-ға артық.