Алматы қаласының Қоғамдық денсаулық сақтау басқармасы Серікжан Сабыралиевтің еңбек шартының мерзімі аяқталуына байланысты 2025 жылдың 13 қазанынан бастап Орталық қалалық клиникалық аурухана (ОҚКА) директоры қызметінен босатылғанын хабарлады, деп хабарлайды Aqshamnews.kz тілшісі.
Бәйге жарияланғанға дейін ауруханаға уақытша басшы болып Алмат Чорманов тағайындалды. Ол бұған дейін Қарасай көпсалалы орталық аудандық ауруханасында жұмыс істеген.
Анықтама бойынша, Алмат Тұрсынжанович Чорманов — хирург, медицина ғылымдарының кандидаты, қауымдастырылған профессор, қоғамдық денсаулық сақтау магистрі; 24 жылдық еңбек өтілінің 18 жылын клиникалық және басқарушылық қызметке арнаған. Сызғанов атындағы Ұлттық ғылыми хирургия орталығында бауыр хирургиясы бөлімінің дәрігері, Алматыдағы №7 қалалық клиникалық ауруханада хирургия жөніндегі бас дәрігердің орынбасары, кейін Сызғанов орталығында бас дәрігер және басқарма төрағасының ғылыми‑клиникалық және инновациялық қызмет бойынша орынбасары қызметтерін атқарған.
Еске салайық, Серікжан Сабыралиев 2023 жылы ОҚКА директоры болып Нариман Табынбаевтың орнына келген. Ол кезде ауруханада бірқатар пациенттен ВИЧ анықталуына байланысты үлкен дау туған. Комиссия 593 байланыста болған адамды және донорларды тексеріп, олардың арасынан жаңа жұқпа анықталмады. Эпидемиологиялық тергеу инфекция инвазивті процедуралар кезінде медицина қызметкерлерінің кінәсінен жұққанын көрсетті.
