Алматы әкімдігі Әуезов ауданындағы Яссауи көшесінде болған жағдайға қатысты пікір білдірді, - деп хабарлайды Аqshamnews.kz тілшісі.
17 қыркүйекте таңертең Яссауи мен Дастан көшелерінің қиылысында жол жабынының шамамен 100 шаршы метр аумақтағы бөлігі опырылды. Бұған дейін "Спецкоммунстрой" мердігер ұйымы ұзындығы 2,8 шақырым болатын кәріз желілерін салу жұмыстарын атқарған болатын.
"Жүргізілген тексеру барысында нөсер жауын кезінде абоненттік желілер траншеяларының шайылуы және топырақ негізінің жұмсаруы анықталды. Соның салдарынан жол жабындысында ойық пайда болып, асфальт бұзылған. Қазір жол төсемін қалпына келтіру жұмыстары жүргізіліп жатыр", - делінген хабарламада.
Жөндеу жұмыстарын аяқтау мерзімі – 18 қыркүйек.
Бұл жобаның техникалық қадағалау қызметі жұмыстардың Құрылыс нормалары мен ережелері жобалық талаптарға сәйкес орындалғанын хабарлады.
"Қазір себептерді анықтау мақсатында қосымша тексеру жүргізіліп жатыр. Яссауи көшесіндегі асфальт жабынының ойылу себептерін нақтылау үшін Қалалық құрылыс бақылау басқармасына сұраухат жолданды. Себебі топырақтың дұрыс нығыздалмауы ықтимал нұсқа ретінде қарастырылып отыр. Оның нақты себебі тексеру нәтижесінде белгілі болады", - деді Алматы әкімінің коммуникация және БАҚ-пен жұмыс бойынша кеңесшісі Ильзат Акчурин.