23 тамызда Алматыдағы этномәдени бірлестіктер мен қалалық Ақсақалдар кеңесінің өкілдері жаңа бір палаталы Құрылтай депутаттарын сайлауда дауыс берді, – деп хабарлайды aqshamnews.kz тілшісі.
Түрлі этнос өкілдері Қазақстанның болашағына жауапкершілікпен қарап, таңдау жасады.
№276 сайлау учаскесінде Алматы қалалық Ақсақалдар кеңесінің мүшесі, «Ариана» ауған орталығы» қоғамдық бірлестігінің құрметті төрағасы Ахмадулла Васток дауыс берді.
№245 сайлау учаскесінде Ақсақалдар кеңесінің мүшесі, «Өзбек орталығы» қоғамдық бірлестігінің төрағасы Абдулхалил Абдраимұлы Уралбаев таңдау жасады.
Ал Алматы қаласындағы Тәжік орталығы филиалының төрағасы, Ақсақалдар кеңесінің мүшесі Додар Хикматұлы Махмадулоев №665 сайлау учаскесінде дауыс берді.
Этномәдени бірлестіктер өкілдерінің сайлауға қатысуы алматылықтардың бірлігі мен ортақ құндылықтарға беріктігін айшықтады. Ұлты мен мәдени дәстүрі әртүрлі болғанымен, баршасын бір Отан — Қазақстан біріктіреді.
Бүгінгі күн — әр азаматқа өз ұстанымын білдіріп, ел болашағын қалыптастыруға үлес қосуға мүмкіндік беретін маңызды сәт. Ал аға буын үшін осы жауапкершілікті жастарға аманаттап, ел бірлігін, өзара құрмет пен ортақ құндылықты дәріптеудің мәні айрықша.
Бір қала, сан түрлі мәдениет — Қазақстанның болашағы үшін.ортақ таңдау.