Алматы қаласы бойынша ҚАЖ департаментінің №11 мекемесінде 1 желтоқсан – Дүниежүзілік ЖИТС-ке қарсы күрес күніне орай аталған инфекцияның таралу жолдары мен одан қалай сақтану туралы дәріс өтті.
Маңызды іс-шараға «Отбасылық дәрігер» қоғамдық қорының жетекшісі Жібек Әменова, «Қамқорлық ТN-2018» қоғамдық қорының жетекшісі Мадияр Әбділов, «Реванш» қорының жетекшісі Елена Белоконь, Қазақстан Рестораторлар клубы қауымдастығының басшысы Гүлнар Нұрғанатқызы, «Европолис» мейрамханасының өкілі Марат Жанболат, Дүнген республикалық этномәдени орталығы төрағасының орынбасары, Алматы қаласы Дүнген мәдени орталығы аналар кеңесінің төрағасы Римма Масырова қатысты.
«Спикерлер аталған аурудың таралуына себеп болатын нашақорлық жайында айтып, қан арқылы берілетін инфекциялық кесел туралы дәріс оқып, аталған тақырып бойынша сотталған жасөспірімдерге толық ақпарат берді. Мақсат, әрине, жастарды қорғау. Біз үшін барлық баланың амандығы, денсаулығының жақсы болуы маңызды», – дейді эпидемиолог-дәрігер Сейілхан Таласбаев.
Ал өз кезегінде колонияда жазасын өтеп жатқан жасөпірімдер ЖИТС тақырыбына арнап дайындаған қабырға газеттерін қорғап, ондағы өздері салған суреттердің мазмұнын, көтерер жүгін жан-жақты түсіндіріп берді.
Іс-шара соңында келген қонақтар сурет байқауында жеңімпаз болған үш жасөспірімді марапаттады, сыйлық ұсынды. Ал мейрамхана өкілі дастарханға балаларға деп арнайы көтере келген пицца, жеміс-жидек, тәтті сусындарын қойды. Жастар меймандарға рахметін айтты.