Алматыда Мұхтар Әуезов атындағы Мемлекеттік академиялық театрды қайта жаңғырту жұмыстары тоқтатылды деген ақпаратқа байланысты ҚР Мәдениет және ақпарат министрлігі ресми түсініктеме берді, деп хабарлайды Aqshamnews.kz тілшісі.
Ведомство мәліметінше, театрдың реконструкциясы тоқтатылған жоқ. Қазіргі таңда жоба жаңа қаржы жылының басталуын күтіп отыр, одан кейін белгіленген тәртіппен жұмыстарды жалғастыруға қажетті қаражат бөлінеді.
"Бірқатар бұқаралық ақпарат құралдарында М. Әуезов атындағы театрды қайта жаңғырту жұмыстарының баяу жүріп жатқаны немесе тоқтатылып тұрғаны туралы жарияланған ақпараттарға байланысты төмендегіні хабарлаймыз. Нысанды қайта жаңғырту жұмыстары тоқтатылған жоқ. Қазіргі уақытта жоба жаңа қаржы жылының басталуын күтуде, содан кейін белгіленген тәртіпке сәйкес жұмыстарды жалғастыру үшін қажетті қаражат бөлінеді. Нысандағы жөндеу жұмыстары уәкілетті мемлекеттік органдардың тұрақты бақылауында. М. Әуезов атындағы театрды қайта жаңғырту оның тарихи және мәдени құндылығын сақтауға қойылатын барлық талаптарды сақтай отырып, толық аяқталатын болады", - делінген жауапта.
Министрлік өкілдері нысандағы жөндеу және қайта құру жұмыстары уәкілетті мемлекеттік органдардың тұрақты бақылауында екенін атап өтті. Жобаны іске асырудың барлық кезеңі бекітілген рәсімдер мен нормативтерге сәйкес жүргізіліп жатыр.
Сондай-ақ министрлік театрды жаңғырту жұмыстары толық көлемде аяқталатынын және оның тарихи әрі мәдени құндылығын сақтау талаптары қатаң сақталатынын мәлімдеді.
