Алматыда «Таза Қазақстан» республикалық бағдарламасы аясында қаланы көркейту және экологиялық мәдениетті арттыру бағытындағы ауқымды жұмыстар жалғасуда, – деп хабарлайды aqshamnews.kz тілшісі.
2026 жылдың басынан бері қаланың барлық ауданындағы 238 орында 23 сенбілік өткізілді. Бұл туралы қалалық Коммуналдық инфрақұрылым және тұрғын үй инспекциясы басқармасының өкілдері хабарлады.
Іс-шараларға 227 мыңға жуық адам қатысып, 7,8 мыңнан астам арнайы техника жұмылдырылды. Тазалық жұмыстары көшелерді, аула аумақтарын, қараусыз қалған учаскелерді, өзен арналарын және қаланың басқа да қоғамдық кеңістіктерін қамтыды.
Сенбіліктердің қорытындысы бойынша 42 мың текше метрге жуық қоқыс пен қалдық жиналып, шығарылды. Сондай-ақ 6,3 мыңнан астам жасыл желек егілді.
«Таза Қазақстан» аясындағы жұмыстар жалғасуда. Акцияның негізгі мақсаты – аумақтарды көркейтумен ғана шектелмей, экологиялық мәдениетті қалыптастыру және қала ортасына жауапкершілікпен қарауға үндеу.
Мұндай іс-шараларға тұрғындардың тұрақты түрде қатысуы қала тазалығын сақтауды күнделікті әдетке айналдыруға ықпал етеді. Қоғамдық орындарға ұқыпты қарау, қоқыс тастамау және айналаны таза ұстау – ортақ қалалық мәдениеттің маңызды бөлігі.