Бостандық ауданының әкімдігі мен Өңірлік коммуникациялар қызметінің мамандары Алматыда ардагерге арнайы барып, майдангерді құттықтады, – деп хабарлайды aqshamnews.kz тілшісі.
Қала билігі қатары күн санап сиреп бара жатқан ардагерлерді елеп-ескеріп, әрқайсысын үнемі уақыт тауып құтықтап қайтуға тырысады. Қазір сол кезде әскерге аттанған ең жас ардагердің өзі жүзге келіп отыр.
Ұлы Отан соғысының ардагері Анатолий Назарович Попов биыл 100 жасқа толды. Ол мектепті бітіре салысымен бірден майданға аттаныпты. Екінші Балтық майданының құрамында байланыс ротасында қызмет етіп, Балтық елдерін азат етуге атсалысқан екен. Ардагер әлі тың көрінді.
Анатолий Назарович «Рига қаласын азат еткені үшін», «Германияны жеңгені үшін» медальымен, сондай-ақ мерейтойлық наградамен марапатталған.
Қызы Наталья Косолапованың айтуынша, жауда жеңгеннен кейін басшылық жас сарбазға оқуын жалғастыруды ұсыныпты. Сөйтіп, медицина саласындағы өмір жолын бастаған. Саратов әскери-медициналық училищесін бітірген соң, 40 жылдан астам уақыт бойы Алматы қаласының (бұрынғы Совет, қазіргі Алмалы) ауданында фельдшер болып еңбек етіпті.
Ардагердің қызы, күйеу баласы, төрт немересі мен жеті шөбересі бар. Осылардың арқасында кәріліктің қалай келгенін де сезбей қалғанын айтты.
Наталья Анатольевна мұндай қамқорлыққа алғыс білдірді.
«Әкімдіктегілердің, еріктілер мен журналистердің өстіп көңіл бөліп, келіп қайтқанына көп рақмет. Бұл соғыс көрген, қан кешкен ұрпақ қой. Біз оларға қарыздармыз. Өздерінің де қатары күн санап азайып барады..», — дейді ол.
Мұндай кездесу өткенге құрмет қана емес, бейбіт өмірді бағалай білуге шақыру. Біз өткеннен сабақ алып, осы бейбіт өмірдің қадірін білуіміз керек.