Алматы әкімі Дархан Сатыбалдынің төрағалығымен Құқық бұзушылықтардың алдын алу жөніндегі ведомствоаралық комиссияның кеңейтілген отырысы өтті, – деп хабарлайды aqshamnews.kz тілшісі.
Жиында қоғамдық қауіпсіздіктің жай-күйі, құқық қорғау органдары жұмысының өзекті мәселелері және қала тұрғындарының қауіпсіздігін арттыруға бағытталған шаралар қаралды.
Биылғы алғашқы бес айының қорытындысы бойынша тіркелген құқық бұзушылықтар саны 10,5%-ға азайғанына қарамастан, бірқатар бағыт әлі де ерекше назар аударуды қажет етеді. Атап айтқанда, жол қозғалысы қауіпсіздігін қамтамасыз ету, интернет алаяқтыққа және есірткінің заңсыз айналымына қарсы күрес, жасөспірімдер арасындағы құқық бұзушылықтың алдын алу, сондай-ақ учаскелік полиция инспекторлары жұмысының тиімділігін арттыру жайы талқыланды.
Отырыста цифрлық технология мен жасанды интеллект негізіндегі шешімдерді енгізуге ерекше көңіл бөлінді. Заманауи бейнеаналитика жүйелері, интеллектуалды мониторинг және деректерді өңдеу құқық бұзушылықтардың алдын алудың, жол қауіпсіздігін күшейтудің және төтенше жағдайға жедел әрекет етудің негізгі құралдарының біріне айналуға тиіс екені атап өтілді.
Шаһар басшысы жұмыстың басты көрсеткіші тұрғындардың қауіпсіздік деңгейін нақты арттыру және олардың сенімін күшейту болуы керектігін айтты. Осыған байланысты профилактикалық жұмысты күшейту, полицияның аумақтық бөлімшелерінің жауапкершілігін арттыру, цифрландыру мен жасанды интеллект мүмкіндіктерін кеңінен пайдалану, мемлекеттік органдар арасындағы өзара іс-қимылды нығайту және азаматтардың өтініштеріне жедел ден қою тапсырылды.
Отырыс қорытындысы бойынша жауапты мемлекеттік органдарға құқық бұзушылықтардың алдын алу шараларын күшейту, есірткі қылмысына қарсы іс-қимылды жандандыру, жол қозғалысы қауіпсіздігін арттыру, заманауи цифрлық шешімдерді енгізу және Алматыдағы құқықтық тәртіпті нығайтуға бағытталған қосымша шараларды жүзеге асыру жөнінде нақты тапсырмалар берілді.